အသက်ကြီးလာတာကြောင့် မိမိအတွက် လိုအပ်လာသည့် အာဟာရဓာတ်များ

အသက်ကြီးလာတဲ့အခါမှာ အစားနည်းသွားတာ၊မိမိကစားထားတဲ့ အစားအစာထဲကအာဟာရတွေကို စုပ်ယူနိုင်မှုနည်းပါးသွားတာနဲ့ ကိုယ်ထဲမှာရှိနေတဲ့အာဟာရဓာတ်တွေဆုံးရှုံးသွားတာကြောင့် အောက်ဖော်ပြပါဗီတာမင်နဲ့ သတ္တုဓာတ်တွေချို့တဲ့လာတတ်ပါတယ်။

ကယ်ဆီယမ် ► အသက်ကြီးလာတဲ့အခါမှာ သင်ငယ်စဉ်ကတည်းက စားထားတဲ့အစားအစာတွေဆီက ရယူထားတဲ့ ကယ်ဆီယမ်တွေဆုံးရှုံးသွားတတ်ပါတယ်။ အစားအစာထဲကစုပ်ယူထားတဲ့ ကယ်ဆီယမ်တွေက အရိုးထဲမှာသိမ်းဆည်းထားတတ်တာမို့ ကယ်ဆီယမ် လျော့ပါးသွားတာကြောင့်သင့် အရိုးတွေ အလွယ်တကူကျိုးပဲ့နိုင်ပါတယ်။အထူးသဖြင့် သွေးဆုံးပြီးတဲ့အမျိုးသမီးတွေမှာဖြစ်တတ်ပါတယ်။ကယ်ဆီယမ်က ကြွက်သား၊အာရုံကြောဆဲလ်နဲ့သွေးကြောတွေကောင်းကောင်းအလုပ်လုပ်နိုင်ဖို့ ကူညီပေးပါတယ်။အသက်၅၀ကျော်အမျိုးသမီးနဲ့ အသက်၇၀ ကျော်အမျိုးသားတွေက တစ်ခြားသူတွေထက် ကယ်ဆီယမ် ၂၀% ပိုမိုလိုအပ်ပါတယ်။ နွားနို့၊ဒိန်ချဉ်နဲ့ ဒိန်ခဲတွေမှာ ကယ်ဆီယမ် များစွာပါဝင်ပါတယ်။

ဗီတာမင် B12 ► သူကသွေးနဲ့ အာရုံကြောဆဲလ်တွေပြုလုပ်ဖို့ ကူညီပေးပါတယ်။ သူ့ကိုအသား၊ငါး၊ကြက်ဥ၊ နို့ထွက် ပစ္စည်းတွေစားသုံးတာတွေအပြင် အားဆေးသောက်တာ၊အားဆေးထိုးတာ၊B12 အားဖြည့်အစားအစာတွေစားသုံးတာကြောင့်လည်း ရရှိနိုင်ပါတယ်။အသက်၅၀ကျော်သူတွေရဲ့၃၀% က အစာအိမ်ကျုံ့သွားတတ်တဲ့အတွက် သူ့ကိုအစားအစာက ရရှိဖို့ ခဲယဉ်းနိုင်ပါတယ်။ ဒါ့အပြင်လေဆေး၊အစာကြေဆေးနဲ့ တစ်ချို့ဆေးဝါးသောက်ရသူနဲ့ အစာအိမ်ခွဲစိတ်ထားရသူတွေကလည်းဗီတာမင်B12ချို့တဲ့နိုင်ပါတယ်။

ဗီတာမင်D ► ဒီဗီတာမင်ကို ခန္ဓာကိုယ်က ကယ်ဆီယမ် စုပ်ယူနိုင်ဖို့အတွက် လိုအပ်ပါတယ်။အရိုးပါးရောဂါမဖြစ်အောင်ကာကွယ်ဖို့ သူ့ကိုလိုအပ်ပါတယ်။ သူက ကြွက်သား၊အာရုံကြောနဲ့ ခုခံအားစနစ် ကောင်းမွန်စွာ အလုပ်လုပ်နိုင်ဖို့လည်းကူညီပေးပါတယ်။ ဗီတာမင်D ကိုနေရောင်ခြည်ကရရှိနိုင်ပေမယ့် အသက်ကြီးသူတွေက နေရောင်ခြည် ကို ဗီတာမင်D ဖြစ်အောင် ပြောင်းလဲပေးနိုင်စွမ်း လျော့နည်း သွားပါတယ်။ အစားအစာကဗီတာမင် D ကိုရရှိဖို့အတွက်ခက်ခဲနိုင်ပေမယ့် ဆဲလ်မွန်ငါး ၊ငါးသလောက် လိုမျိုးအဆီများတဲ့ငါးတွေနဲ့ ကြက်ဥအနှစ် မှာ ဗီတာမင်Dကြွယ်ဝစွာပါဝင်ပါတယ်။

ဗီတာမင်B6 ► ခန္ဓာကိုယ်က သူ့ကိုရောဂါပိုးတွေကိုတိုက်ခိုက်ဖို့ နဲ့ စွမ်းအင်ရရှိဖို့ အတွက် လိုအပ်ပါတယ်။ကလေးတွေဦးနှောက်ဖွံ့ဖြိုးဖို့အတွက်လည်းသူက ကူညီပေးပါတယ်။အသက်ကြီးလာတဲ့အခါမှာ ဒီဗီတာမင်ကိုပိုမိုလိုအပ်ပါတယ်။ အသက်ကြီးသူတွေရဲ့ကိုယ်တွင်းမှာဗီတာမင်B6 များပြားစွာရှိနေတာက မှတ်ဉာဏ်ကောင်းမွန်တာနဲ့ဆက်စပ်မှုရှိတယ်လို့ လေ့လာမှုအရသိရပါတယ်။ သူကကုလားပဲ၊ အသည်း၊အဆီများတဲ့ငါးနဲ့ ဗီတာမင်အားဖြည့်ကွေကာ တွေမှာအများအပြားပါဝင်ပါတယ်။

မဂ္ဂနီဆီယမ် ► သူက ခန္ဓာကိုယ်က ပရိုတင်းနဲ့အရိုးကို ထုတ်လုပ်နိုင်ဖို့ ကူညီပေးပြီးသွေးတွင်းသကြားဓာတ်တည်ငြိမ်မှုရှိအောင် ထိန်းချုပ်ပေးပါတယ်။ သူ့ကိုအခွံမာသီး၊အစေ့အဆန်နဲ့ အစိမ်းရောင်ဟင်းသီးဟင်းရွက်စားသုံးတာကနေရရှိနိုင်ပေမယ့် အသက်ကြီးသူတွေက ဒီအစာတွေကိုစားသုံးမှုနည်းပါးတတ်ပါတယ်။ နာတာရှည်ရောဂါရှိသူနဲ့ဆေးဝါးမှီဝဲနေရသူတွေက မဂ္ဂနီဆီယမ်ချို့တဲ့နိုင်ပါတယ်။

ပရိုဘိုင်ရောတစ်စ် ► အူအတွက်ကောင်းကျိုးပေးတဲ့ လူ့အကျိုးပြုဘက်တီးရီးယားတွေပါ။ဒိန်ချဉ်နဲ့ ကင်ချီလိုမျိုး အချဉ်ဖောက်ထားတဲ့ အစားအစာတွေနဲ့အားဖြည့်ဆေးတွေကသူ့ကိုရရှိနိုင်ပါတယ်။ ဝမ်းပျက်ရောဂါနဲ့ ဓာတ်မတည့်မှုတွေအတွက် အလွန်ကောင်းမွန်ပါတယ်။သင့်မှာရောဂါတစ်ခုခုရှိနေရင် ဒါမှမဟုတ် ခုခံအားကျဆင်းနေရင် သူ့ကိုမမှီဝဲခင် ဆရာဝန်နဲ့အရင်တိုင်ပင်ပါ။

အိုမီဂါ -၃ ► Omega-3 fatty acids ကိုခန္ဓာကိုယ်က မပြုလုပ်ပေးနိုင်ပါဘူး။သူတို့ကမျက်စိ၊ဦးနှောက်နဲ့သုတ်ပိုးဆဲလ်တွေအတွက်အလွန်အရေးကြီးပါတယ်။သူက အယ်ဇိုင်းမား၊အဆစ်ရောင်ရောဂါနဲ့ အမြင်အာရုံဆုံးရှုံးနိုင်တဲ့ မက်ကူလာပျက်စီးမှု အစရှိတဲ့ အသက်ကြီးတာကြောင့်ဖြစ်ပေါ်လာတဲ့ရောဂါတွေ မဖြစ်ရလေအောင် ကာကွယ်ပေးပါတယ်။ အဆီများတဲ့ငါးနဲ့ သစ်ကြားသီးလိုမျိုး အစားအစာတွေက သူ့ကိုရရှိနိုင်ပါတယ်။

သွပ်ဓာတ် ► သူက အသက်ကြီးသူတွေမှာဖြစ် ပေါ်လေ့ရှိတဲ့ အနံ့နဲ့အရသာကောင်းမွန် ဖို့ ၊ရောဂါပို့မွှားနဲ့ရောင်ရမ်းမှုကိုတွန်းလှန်ဖို့ ကူညီပေးပါတယ်။အမြင် အာရုံချို့တဲ့မှုမရှိအောင်လည်းကာကွယ်ပေးပါတယ်။ သူ့ကို ကမာကောင်၊အမဲသား၊ဂဏန်းနဲ့ အားဖြည့် ကွေကာတွေကနေရရှိနိုင်ပါတယ်။

ဆီလီနီယမ် ► သူကဆဲလ်တွေပျက်စီးမှု မရှိအောင်၊ရောဂါပိုးမွှားမဝင်ရောက်အောင်နဲ့ သိုင်းရွိုက်လုပ်ငန်းကောင်းမွန်ဖို့ ကူညီပေးပါတယ်။ကြွက်သားသန်မာစေပြီး အသက်အရွယ်ကြောင့်ဖြစ်ပေါ်လာတဲ့သူငယ်ပြန်ရောဂါ၊ တစ်ချို့ကင်ဆာနဲ့ သိုင်းရွိုက်ရောဂါ မဖြစ်အောင်ကာကွယ်ပေးပါတယ်။ Brazil nuts ကို တစ်နေ့နှစ်လုံးစားရုံနဲ့ လုံလောက်ပါတယ်။ကိုယ်တွင်းမှာ ဆီလီနီယမ် များလွန်းရင် ဆံပင်ကျွတ်တာနဲ့ လက်သည်းခြေသည်း ကျွတ်ဆတ်နိုင်ပါတယ်။

ပိုတက်ဆီယမ် ► သူက ကိုယ်ထဲက နှလုံး၊ ကျောက်ကပ်၊ ကြွက်သားနဲ့ အာရုံကြောအပါအဝင် အစိတ်အပိုင်းအားလုံးအတွက် အသုံးဝင်ပါတယ်။သွေးတိုးရောဂါ၊လေဖြတ်တာနဲ့ အရိုးပါးရောဂါ မဖြစ် အောင်လည်းကာကွယ်ပေးပါတယ်။ငှက်ပျောသီး၊ဟင်းနုနယ်ရွက်၊နွားနို့နဲ့ ဒိန်ချဉ်မှာများစွာပါဝင်ပါတယ်။သူကသွေးတိုးကျဆေး၊ခေါင်းတစ်ခြမ်းကိုက်ဆေးမှီဝဲနေစဉ်နဲ့ တစ်ချို့ရောဂါအခြေအနေတွေမှာ အနှောင့်အယှက်ဖြစ်စေတာမို့ သူပါဝင်တဲ့ဆေးဝါးကို မသောက်ခင်မှာ ဆရာဝန်နဲ့ အရင်တိုင် ပင်ပါ။

ဖော့လိတ် ► ဗီတာမင်B9လို့လည်းခေါ်ပြီး အစိမ်းရောင်အရွက်၊ အခွံမာသီးနဲ့ ပဲ အမျိုးမျိုးမှာ ပါရှိတတ်ပါတယ်။ကိုယ်ဝန်ဆောင်မိခင်တွေအနေနဲ့ မိမိကလေးမွေးရာပါ အာရုံကြောချို့တဲ့မှု မဖြစ်အောင်ကာကွယ်ပေးပါတယ်။ သူက ဆဲလ်ကြီးထွားမှုရှိအောင်ကူညီပေးပြီး တစ်ချို့ကင်ဆာရောဂါနဲ့ လေဖြတ်တာ မဖြစ်အောင်ကာကွယ်ပေးပါတယ်။ အစားအသောက်မှရရှိတဲ့ ဖောလိတ်ကအန္တရာယ်ကင်းပေမယ့် ဖောလိတ် အားဆေးကို အလွန်အကျွံမှီဝဲမိရင် အူမကြီးကင်ဆာဖြစ်တာဒါမှမဟုတ် အာရုံကြောပျက်စီးတာဖြစ်နိုင်ပါတယ်။

အမျှင် ► အသက်ကြီးသူတွေက အမျှင်ဓာတ်ကို လုံလုံ လောက်လောက်ရရှိဖို့ အတွက်အလွန်အမင်းအရေးကြီးပါတယ်။ သူကလေဖြတ်ခြင်းမဖြစ်အောင်ကာကွယ်ပေးတာ၊ဝမ်းမှန်မှန်သွားစေတာ၊ သွေးတွင်းက ကိုလက်စတရောနဲ့ သကြားဓာတ်လျော့ကျ စေတာမို့ အသက်ကြီးသူတွေအတွက် များစွာ အကျိုးရှိနိုင်ပါတယ်။အသက်၅၀ကျော် အမျိုးသမီးတွေအနေနဲ့ တစ်နေ့ကို ၂၁ ဂရမ်လိုအပ်ပြီး အမျိုးသားတွေက ၃၀ ဂရမ်လိုအပ်ပါတယ်။

ဖော်ပြပါအာဟာရဓာတ်တွေကို ဘယ်လိုရရှိနိုင်ပါသလဲ။ ► ဗီတာမင်၊ သတ္တုဓာတ် ဒါမှမဟုတ် အမျှင်ဓာတ်တွေကို အစားအစာ စားသုံးတာက ရရှိရင်အကောင်းဆုံးပါပဲ။ဒါပေမဲ့ များသောအားဖြင့် လူတွေက အစားအသောက်ကိုညီညွတ်မျှတအောင် မစားသုံးတတ်ကြတဲ့အတွက် ဗီတာမင်D၊ပိုတက်ဆီယမ်၊ ကယ်ဆီယမ်နဲ့ အမျှင်ဓာတ်တွေက ချို့တဲ့လေ့ရှိတတ်ကြပါတယ်။

သင့်အနေနဲ့ အစာချေး(ဂျီး)များတာ၊ ဝိတ်တက်မှာစိုးရိမ်လို့အစားလျော့စားတာကြောင့် အာဟာရချို့တဲ့ နိုင်တယ် လို့ထင်မှတ်ပြီး ဗီတာမင်နဲ့ သတ္တုဓာတ် အားဖြည့် ဆေးဝါးတွေကိုမှီဝဲချင်ရင် တော့ ဆရာဝန်နဲ့ အရင်တိုင်ပင် ဆွေးနွေးပါ။

ဒေါက်တာခင်မိုးမိုး

Post Author: Good Health Admin