နှစ်နှစ်ခြိုက်ခြိုက် အိပ်မပျော်သူတွေ စားသင့်သော အစားအစာများ

• ညအိပ်ရာဝင်စဉ်မှာ တော်ရုံနဲ့အိပ်မပျော်လို့ မယ်လတိုနင် ဒါမှမဟုတ် အိပ်ဆေး သောက်အိပ်နေရပါသလား။

• ကြက်အိပ်ကြက်နိုးလို ဖြစ်နေလို့ အိပ်ရေးမဝ ဖြစ်နေပါသလား။

• ကိုဗစ်ကူးစက်နှုန်းများနေစဉ်မှာ မိမိရဲ့ကိုယ်ခံအားကောင်းမွန်နေဖို့ အိပ်ရေးဝ အောင်အိပ်ရဖို့ကလည်း အရေးကြီးပါတယ်။

• အိပ်ဆေးမသောက်ဘဲ အိပ်ရာပေါ်ခေါင်းချလိုက်တာနဲ့ အိပ်ပျော်နိုင်ဖို့၊ နှစ်နှစ် ခြိုက်ခြိုက်အိပ်ပျော်နိုင်ဖို့အတွက် ပိုတက်စီယမ်၊ မဂ္ဂနီဆီယမ်၊ ကယ်လ်စီယမ်နဲ့ သံ ဓာတ်ပါဝင်တဲ့ အောက်ဖော်ပြပါ အစားအစာတွေကို စားသုံးရပါမယ်။ ဒီသတ္တုဓာတ် တွေက အိပ်စက်မှုကို ကောင်းမွန်စေတဲ့ ကိုယ်တွင်းမယ်လတိုနင်ထုတ်လုပ်မှုကို ကူညီနိုင်လို့ပါ။

ငှက်ပျောသီး
သူ့မှာများစွာပါဝင်တဲ့ မဂ္ဂနီဆီယမ်နဲ့ ပိုတက်စီယမ်တွေက ကြွက်သားတင်းမာမှု နဲ့ အာရုံကြောကို ဖြေလျှော့ပေးနိုင်တာကြောင့် အညောင်းပြေပြီး စိတ်တည်ငြိမ် အေး ချမ်းမှုကို ရရှိနိုင်ပါတယ်။သူ့မှာပါဝင်တဲ့ ဗီတာမင် B6 က Tryptophan ကို ဆီရိုတိုနင် အဖြစ် ပြောင်းလဲပေးနိုင်တာမို့ ပိုပြီးစိတ်ပြေလျော့မှုရှိနိုင်ပါတယ်။

ပျားရည်
ပျားရည်က အိပ်စက်မှုကောင်းစေတဲ့ ဟော်မုန်းမယ်လတိုနင် ထွက်ရှိလာအောင် လှုံ့ဆော်မှုပေးနိုင်ပါတယ်။ ညနေစာစားအပြီး ရေနွေးတစ်ခွက်ထဲ ရှောက်ရည်နဲ့ပျား ရည် လက်ဖက်ရည်ဇွန်း တစ်ဇွန်းစီ ထည့်ပြီးသောက်ပါ။

ဗာဒံစေ့
သူ့မှာလည်း ကြွက်သားဖြေလျှော့နိုင်တဲ့ မဂ္ဂနီဆီယမ်နဲ့ Tryptophan တွေ များ စွာပါဝင်ပါတယ်။ အာရုံကြောစနစ်လုပ်ဆောင်မှုလည်း ကောင်းမွန်နိုင်တာမို့ အိပ်ခါနီး လက်တစ်ဆုပ်စာလောက်စားပေးရင် နှစ်ခြိုက်စွာ အိပ်မောကျနိုင်ပါတယ်။

ကန်စွန်းဥ
သူ့မှာများစွာပါဝင်တဲ့ ပိုတက်စီယမ်၊ မဂ္ဂနီဆီယမ်နဲ့ ကယ်လ်စီယမ်တွေက စိတ် ဖြေလျှော့မှုရရှိနိုင်တဲ့အတွက် ညစာအဖြစ် စားသုံးနိုင်ပါတယ်။

ချယ်ရီသီး
သူ့မှာ မယ်လတိုနင်က သဘာဝအတိုင်း ပါဝင်တာမို့ နှစ်နှစ်ခြိုက်ခြိုက် အိပ်ပျော် နိုင်တဲ့အစားအစာဖြစ်ပါတယ်။

ကြက်ဆင်သား
ပရိုတင်းပါဝင်မှုများတဲ့အတွက် အိပ်စက်မှုကောင်းမွန်နိုင်ပါတယ်။ သူ့မှာပေါ ကြွယ်ဝစွာ ပါဝင်တဲ့ အမိုင်နိုအက်စစ် Tryptophan က စိတ်ခံစားချက်ကို ထိန်းချုပ် နိုင်တာကြောင့် အတွေးမများနိုင်တော့ပါဘူး။ သူက ကိုယ်တွင်းက ဟော်မုန်းညီညွတ် မျှတမှုရှိစေပြီး စိုးရိမ်စိတ်ကို တိုက်ထုတ်နိုင်တာကြောင့် အိပ်မောကျနိုင်ပါတယ်။

ကြက်ဆင်သား မရှိရင်လည်း Tryptophan ပါဝင်တဲ့ ဆန်လုံးညို၊ ဒိန်ချဉ်နဲ့ ငါးဟင်းစားနိုင်ပါတယ်။

——————————————————————–

အိပ်စက်မှုကောင်းမွန်ဖို့ အထက်ပါအစားအစာတွေကို စားသင့်သလို အိပ်ရာဝင် ခါနီးမှာ အောက်ပါ အစားအစာတွေကို ရှောင်ကြဉ်ဖို့ လိုအပ်ပါတယ်။

ကဖင်းပါဝင်သောအစားအစာ
ကဖင်းပါဝင်တဲ့ ချော့ကလက်၊ ကော်ဖီ၊ လက်ဖက်ရည်နဲ့စွမ်းအားဖြည့် အချိုရည် တွေကို အိပ်ရာဝင်ခါနီး ၄-၆ နာရီ အလိုမှာ မသောက်ရပါ။

ဒိန်ခဲ
ဒိန်ခဲနဲ့ ဝက်ပေါင်ခြောက်လိုမျိုးပြုပြင်ထားတဲ့ အသားတွေမှာ များစွာပါဝင်တဲ့ အမိုင်နိုအက်စစ် Tyramine က သင့်ကိုနိုးကြားတက်ကြွစေနိုင်တာကြောင့် မျက်စိ ကြောင်နိုင်ပါတယ်။

ဆီပြန် အစပ်ဟင်းများ
ဒီဟင်းတွေမှာ ငရုတ်သီးတွေများစွာပါဝင်တာကြောင့် ခန္ဓာကိုယ်ရဲ့ကိုယ်အပူချိန် ထိန်း ချုပ်တဲ့လုပ်ငန်းကိုထိခိုက်ကာ ကိုယ်တွင်းအပူများလာတာကြောင့် အိပ်စက်မှုကို အ နှောင့်အယှက်ဖြစ်စေနိုင်ပါတယ်။ ဒါ့ပြင် အဆီနဲ့ အစပ်တွေကိုချေဖျက်ဖို့ စွမ်းအင်ပိုမိုအသုံး ပြုရတာကြောင့် နှစ်နှစ်ခြိုက်ခြိုက်အိပ်မပျော်နိုင်တော့ပါ။

ကိတ်မုန့်၊ ရေခဲမုန့်နဲ့အချိုလွန်ကဲသောအစားအစာများ
ဒီအစားအစာတွေကြောင့် သွေး တွင်းသကြားဓာတ် မြင့်တက်လာတာ ကို ခန္ဓာကိုယ်က တုံ့ပြန်တဲ့အနေနဲ့ ကော်တီစောတွေ ထွက်ရှိလာတာ ကြောင့် မျက်စိကြောင်နိုင်ပါတယ်။

အာလူးကြော်
ဒီအစာတွေမှာ ဆားပါဝင်မှု များ ပြားတာကြောင့် ကိုယ်တွင်းရေစု ဆောင်းမှုများလာကာ ပင်ပန်းနွမ်းနယ် နိုင်ပါတယ်။ အိပ်ခါနီး ၂-၃ နာရီအ လိုမှာ မစားသင့်ပါ။

Tips
• ညစာကို အရမ်းနောက်ကျပြီးမှ မစားပါနဲ့။

• ညစာကို ပမာဏ အသင့်အတင့် သာ စားသုံးပါ။ စားတဲ့ပမာဏများလွန်း တာကြောင့် အစာကြေဖို့ ခက်ခဲနိုင်ပါ တယ်။

• ညစာစားအပြီး ကော်ဖီ ဒါမှမ ဟုတ် အချိုရည်မသောက်ပါနဲ့။ ည တစ်ရေးနိုးနိုင်ပါ တယ်။

• အိပ်ခါနီး အစာအနည်းငယ်စား ပေးပါ။ ဗိုက်ထဲမှာ အစာမရှိဘဲ အိပ် စက်တာက သွေးတွင်းသကြားဓာတ် လျော့ကျနိုင်ပြီး အိပ်ပျော်ဖို့ ခဲယဉ်းနိုင် ပါတယ်။

• သင့်ကိုယ်တွင်း ခုခံစွမ်းအား ကောင်းမွန်စေဖို့ နှစ်နှစ်ခြိုက်ခြိုက် အိပ်မောကျနိုင်ကြပါစေ။

#ဒေါက်တာခင်မိုးမိုး
#Health&Nutrition
#GoodHealthJournal_846

Post Author: Good Health Journal