သင့်လက်နှင့် လက်ချောင်းများအတွက် လေ့ကျင့်ခန်းများ

♦ အသက်ကြီးလာတဲ့အခါမှာ လက်ရဲ့ သန်မာအားတွေလျော့ကျလာပါတယ်။ အဆစ်ရောင်ရောဂါရှိသူတွေမှာလည်း လက်ဆစ်တွေက နာကျင်နေတတ်တာကြောင့် လက်ရဲ့ ရွေ့လျားနိုင်မှုနဲ့ လက်သန်မာမှုတွေလျော့ကျသွားတတ်ပါတယ်။ ဒါ့အပြင် အခုလိုခေတ်အခြေအနေအရ ကွန်ပျူတာနဲ့ အလုပ်လုပ်ရတာနဲ့ ဖုန်းတစ်ချိန်လုံး အသုံးပြုတာတွေကြောင့် သင့်လက်နာတာ၊ လက်ချောင်းလေးတွေကိုက်ခဲတာ၊ ထုံကျဉ်တာတွေကို မလွဲမသွေ ခံစားရကြပါလိမ့်မယ်။ ဒီပြဿနာတွေအတွက် –

♦ အခုဖော်ပြပေးမယ့် လေ့ကျင့်ခန်းတွေက လက်နဲ့ လက်ချောင်းတွေကို အားဖြည့်သန်မာနိုင်စေတာမို့ နာကျင်မှုသက်သာနိုင်ပါတယ်။

လက်သီးဆု်ပလေ့ကျင့်ခန်း

♦ လက်နဲ့လက်ချောင်းတွေကို သန်မာစေပြီး ရွေ့လျားမှုပိုမိုကောင်းမွန်စေကာ နာကျင်တာတွေ သက်သာသွားနိုင်ပါတယ်။ လက်သီးဆုပ်ပါ။ လက်ထဲမှာ တင်းကျပ်သလိုဖြစ်တဲ့အထိ ပြုလုပ်ရပါမယ်။

#ပြုလုပ်နည်း
♦ ပုံမှာပြထားတဲ့အတိုင်း လက်သီးဆုပ်ပါ။ သင့်လက်မက ကျန်လက်ချောင်းတွေကို ဖိထားရပါမယ်။
♦ စက္ကန့် ၃၀-၆၀ ခန့်ထားပြီး လက်သီးဖြည်ကာ လက်ချောင်းတွေကို ကားဆန့်လိုက်ပါ။
♦ လက်တစ်ဖက်စီအတွက် လေးကြိမ်စီ ပြုလုပ်ပေးပါ။

လက်ချောင်းဆန့်လေ့ကျင့်ခန်း

♦ ဒီလေ့ကျင့်ခန်းကတော့ နာကျင်တာ သက်သာနိုင်ပြီး လက်ရွေ့လျားမှု ပိုမိုကောင်းမွန်နိုင်ပါတယ်။

#ပြုလုပ်နည်း

♦ စားပွဲတစ်ခုပေါ်မှာ ပုံပါအတိုင်း လက်ဖဝါး တင်ထားပါ။
♦ သင့်လက်ချောင်းတွေကို စားပွဲမျက်နှာပြင်နဲ့ ထိနိုင်သလောက် ထိကပ်အောင် ဆန့်ထုတ်ပါ။
♦ စက္ကန့် ၃၀-၆၀ ခန့်ထားပြီး မူလနေရာပြန်ထားပါ။
♦ လက်တစ်ဖက်စီအတွက် လေးကြိမ်စီပြုလုပ်ပါ။

လက်သည်းကုပ် လေ့ကျင့်ခန်း

♦ ဒီလေ့ကျင့်ခန်းကတော့ လက်ချောင်းလေးတွေ ရွေ့လျားမှု ကောင်းမွန်စေနိုင်ပါတယ်။

#ပြုလုပ်နည်း

♦ လက်ဖဝါးကို သင့်ဘက်မျက်နှာမူပြီး လက်ကို သင့်အရှေ့မှာထားပါ။
♦ လက်ချောင်းတွေကို သူတို့ရဲ့ အောက်ခြေအ ဆစ်ရောက်အောင် ပုံပါအတိုင်း ကွေးပါ။
♦ စက္ကန့် ၃၀-၆၀ ခန့်ထားပြီး မူလနေရာ ပြန်ထားပါ။
♦ လက်တစ်ဖက်စီအတွက် လေးကြိမ်စီ ပြုလုပ်ပါ။

လက်ဆုပ်လက်ကိုင် သန်မာစေသည့် လေ့ကျင့်ခန်း

♦ ဒီလေ့ကျင့်ခန်းကတော့ တံခါးလက်ကိုင်ဖုကို ဖွင့်ရလွယ်ကူစေပြီး ပစ္စည်းတွေမလွတ်ကျအောင်လည်း ထိထိမိမိ ဆုပ်ကိုင်နိုင်ပါတယ်။

#ပြုလုပ်နည်း

♦ တင်းနစ်ဘောလုံးတစ်လုံးကို သင့်လက်နဲ့ ဆုပ်ကိုင်ပြီး အားစိုက်ကာ ညှစ်ပေးပါ။
♦ စက္ကန့် အနည်းငယ်ခန့်ထားပြီး ဖြေလျှော့ပါ။
♦ လက်တစ်ဖက်စီအတွက် ၁၀-၁၅ ခါစီ ပြုလုပ်ပါ။
♦ တစ်ပတ်ကို နှစ်ကြိမ် သုံးကြိမ်လောက်ပြုလုပ်ပေးပါ။ ဒါပေမဲ့ တစ်ကြိမ်နဲ့ တစ်ကြိမ်ကြား ၄၈ နာရီခြားထားရပါမယ်။
♦ သင့်လက်မအဆစ်နာနေရင်တော့ ဒီလေ့ကျင့်ခန်းကို မပြုလုပ်ရပါ။

လက်ဆွဲဆိတ်သန်မာစေသည့် လေ့ကျင့်ခန်း

♦ ဒီလေ့ကျင့်ခန်းကတော့ လက်မနဲ့ လက်ချောင်း ကြွက်သားတွေကို သန်မာစေနိုင်ပါတယ်။ တံခါးကို သော့နဲ့ လှည့်ဖွင့်တာ၊ ရေသန့်ဘူးအဖုံးဖွင့်တာလိုမျိုးတွေကို ဒီလေ့ကျင့်ခန်းကြောင့် လွယ်ကူစွာ ပြုလုပ်နိုင်ပါတယ်။

#ပြုလုပ်နည်း

♦ ဘောလုံးပျော့တစ်လုံး ဒါမှမဟုတ် stress ball တစ်လုံးကို သင့်လက်မနဲ့ လက်ချောင်းထိပ်တွေ အသုံးပြုပြီး ပုံပါအတိုင်း ဖျစ်ညှစ်ပါ။
♦ စက္ကန့် ၃၀-၆၀ ခန့်ထားပါ။
♦ လက်တစ်ဖက်စီအတွက် ၁၀-၁၅ ခါစီ ပြုလုပ်ပါ။
♦ တစ်ပတ်ကို နှစ်ကြိမ် သုံးကြိမ်လောက်ပြုလုပ်ပေးပါ။ ဒါပေမဲ့ တစ်ကြိမ်နဲ့ တစ်ကြိမ်ကြား ၄၈ နာရီခြားထားရပါမယ်။
♦ သင့်လက်မအဆစ်နာနေရင်တော့ ဒီလေ့ကျင့်ခန်းကို မပြုလုပ်ရပါ။

လက်ချောင်းမ, တင် လေ့ကျင့်ခန်း

♦ လက်ချောင်းတွေ ကွေးနိုင်ဆန့်နိုင်အား ပိုမိုအားကောင်းပြီး ရွေ့လျားမှု တိုးတက်နိုင်ပါတယ်။

#ပြုလုပ်နည်း
♦ သင့်လက်ဖဝါးနဲ့ စားပွဲတစ်လုံးပေါ်ကို ဖိထားပါ။
♦ တစ်ကြိမ်ကို စားပွဲပေါ်မှာ လက်တစ်ချောင်းစီ မြှောက်ပြီး ပြန်ချရပါမယ်။
♦ လက်တစ်ဖက်စီအတွက် ၈-၁၂ ကြိမ်စီပြုလုပ်ပါ။

လက်မဆန့် လေ့ကျင့်ခန်း

♦ လက်မကြွက်သားတွေ သန်မာအောင် ပြုလုပ်ပေးတာက လက်ရဲ့ ဆုပ်ကိုင်အားကောင်းမွန်စေပြီး သံဘူးနဲ့ ပုလင်းလိုမျိုး လေးပင်တဲ့ပစ္စည်းတွေကို မ, ထားနိုင်ပါတယ်။

#ပြုလုပ်နည်း

♦ သင့်လက်ဖဝါးကို စားပွဲပေါ်ကပ်တင်ထားပါ။ သားရေကွင်းတစ်ကွင်းကို ပုံပါအတိုင်း လက် မှာ ပတ်ထားပါ။
♦ သင့်လက်မကို လက်ချောင်းတွေနဲ့ ဝေးနိုင်သလောက် ဝေးအောင် ဆန့်ကားပါ။
♦ စက္ကန့် ၃၀-၆၀ ခန့်ထားပြီး မူလနေရာ ပြန်ထားပါ။
♦ လက်တစ်ဖက်စီအတွက် ၁၀-၁၅ ခါပြုလုပ်ပါ။
♦ တစ်ပတ်ကို နှစ်ကြိမ် သုံးကြိမ်လောက်ပြုလုပ် ပေးပါ။ ဒါပေမဲ့ တစ်ကြိမ်နဲ့တစ်ကြိမ်ကြား ၄၈ နာရီခြားထားရပါမယ်။
♦ သင့်လက်မအဆစ်နာနေရင်တော့ ဒီလေ့ကျင့် ခန်းကို မပြုလုပ်ရပါ။

လက်မကွေးလေ့ကျင့်ခန်း

♦ လက်မရဲ့ ရွေ့လျားမှု ပိုမိုကောင်းမွန်နိုင်ပါတယ်။

#ပြုလုပ်နည်း

♦ သင့်လက်ဖဝါးကို ပုံပါအတိုင်း သင့်အရှေ့မှာ ထားပါ။
♦ လက်မကို တခြားလက်ချောင်းတွေနဲ့ အဝေး ဆုံးရောက်အောင် ဆန့်ထုတ်ပါ။ ပြီးရင် လက်မ ကို လက်သန်းအောက်အဆစ်နဲ့ ထိအောင် ကွေးပါ။
♦ စက္ကန့် ၃၀-၆၀ ခန့်ထားပါ။
♦ လက်မတစ်ဖက်စီအတွက် လေးကြိမ်စီ ပြု လုပ်ပါ။

လက်မထိ လေ့ကျင့်ခန်း

♦ ဒီလေ့ကျင့်ခန်းကတော့ လက်မရွေ့လျားမှု ကောင်းမွန်နိုင်ပြီး သွားတိုက်တံ၊ ဇွန်း၊ ခက်ရင်းနဲ့ ဘောပင်လိုမျိုး ပစ်္စည်းတွေ မ,ယူဖို့ လွယ်ကူနိုင်ပါတယ်။

#ပြုလုပ်နည်း

♦ လက်ကောက်ဝတ်ကို ဆန့်ဆန့်ထားပြီး သင့်လက်ကို သင့်အရှေ့မှာမြှောက်ထားပါ။
♦ သင့်လက်မက တစ်ကြိမ်ကို လက်တစ်ချောင်းစီနဲ့ထိပြီး “၀”လုံးပုံ ဖော်သွားပါ။
♦ “၀”လုံးတစ်လုံးစီအတွက် စက္ကန့် ၃၀-၆၀ ခန့် ထားပါ။
♦ လက်တစ်ဖက်စီကို လေးကြိမ်စီပြုလုပ်ပါ။

လက်မ ဆွဲဆန့် လေ့ကျင့်ခန်း

♦ သင့်လက်မ သန်မာဖို့ ဒီလက်မဆွဲဆန့် လေ့ကျင့်ခန်းနှစ်မျိုးကို ပြုလုပ်ပါ။

#ပြုလုပ်နည်း

♦ လက်ဖဝါးကို သင့်ဘက်မျက်နှာမူပြီး သင့်လက်ကို သင့်အရှေ့မှာထားပါ။ သင့်လက်မထိပ်ကို လက်ညှိုးအောက်ခြေအဆစ်နဲ့ ထိအောင် ကွေးပါ။ ဒီအတိုင်း စက္ကန့် ၃၀-၆၀ ခန့်ထားပြီး မူလနေရာပြန်ထားပါ။ လေးကြိမ် ပြုလုပ်ပါ။
♦ လက်ဖဝါးကို သင့်ဘက်မျက်နှာမူပြီး သင့်လက်ကို သင့်အရှေ့မှာထားပါ။ သင့်လက်မထိပ်ကို လက်သန်းအောက်ခြေအဆစ်နဲ့ ထိအောင်ကွေးပါ။ စက္ကန့် ၃၀-၆၀ ခန့်ထားပြီး မူ လနေရာပြန်ထားပါ။ လေးကြိမ်ပြုလုပ်ပါ။

Tips

♦ သင့်လက်နဲ့ လက်ချောင်းတွေက နာကျင်တောင့်တင်းနေရင် လေ့ကျင့်ခန်း မပြုလုပ်ခင်မှာ ငါးမိနစ် ဆယ်မိနစ်ခန့် လက်ကို ရေနွေးနဲ့ အရင်စိမ်ထားပါ။ လက်နွေးသွားမှ လေ့ကျင့်ခန်းလုပ်ရတာ ပိုပြီး လွယ်ကူနိုင်ပါမယ်။
♦ ကလေးတွေ ဆော့ကစားတဲ့ Play Doh ခေါ် ရွှံ့စေးတွေနဲ့ အရုပ်လုပ်နေတာကလည်း လက်ချောင်းတွေရွေ့လျားမှုကောင်းမွန်စေပြီး လက်သန်မာစေနိုင်ပါတယ်။ လေ့ကျင့်ခန်းလုပ်နေတယ်လို့တောင် မထင်ရနိုင်ပါဘူး။ ဒါကြောင့် Play Doh လေးတွေဝယ်ပြီး ကလေးတွေကို အရုပ်မျိုးစုံလုပ်ပေးလိုက်ပါ။ တစ်ချက်ခုတ် နှစ်ချက်ပြတ်ပေါ့။

♥ ဒေါက်တာခင်မိုးမိုး

Post Author: Good Health Journal