ခုခံအားစနစ် ကောင်းဖို့အတွက် ဗီတာမင်များ

အခုဆိုရင် ပြည်တွင်းလေကြောင်းလိုင်းတွေပြန်ဖွင့်နေပြီး မကြာခင်နိုင်ငံတကာ လေကြောင်းလိုင်းတွေ ပြန်ဖွင့်တော့မှာဖြစ်တာကြောင့် ကိုဗစ်ကို ရင်ဆိုင်နိုင်ဖို့အတွက် Mask တပ်တာ၊ လက်ဆေးတာနဲ့ တစ်ဦးနဲ့တစ်ဦး ခပ်ခွာခွာနေတာတွေအပြင် ခုခံအား စနစ်ကိုလည်း သန်မာအောင်ပြုလုပ်ထားရပါတော့မယ်။ ခုခံအားစနစ်ကောင်းမွန်နေရင် ကိုဗစ်ရယ်မှ မဟုတ်ပါဘူး။ ခုလိုဆောင်းရာသီမှာဖြစ်တတ်တဲ့ အအေးမိ၊ တုပ်ကွေးနဲ့ တခြားကျန်းမာရေးပြဿနာတွေအတွက်လည်း ကာကွယ်နိုင်ပါတယ်။

ခုခံအားစနစ်ကောင်းမွန်အောင် အိပ်ရေးဝဝအိပ်တာ၊ လေ့ကျင့်ခန်းပုံမှန်လုပ်တာ၊ စိတ်ဖိစီးမှုကို လျှော့ချတာတွေအပြင် ခန္ဓာကိုယ်က အောက်ဖော်ပြပါ ဗီတာမင်နဲ့ သတ္တု ဓာတ်တွေကို ရရှိဖို့လိုအပ်ပါတယ်။

♦ ဗီတာမင် စီ
ဗီတာမင် စီက ရောဂါပိုးမဝင်အောင် ကာကွယ်နိုင်တာ ဒါမှမဟုတ် ပိုးဝင်ရောက် ချိန်တိုတောင်းနိုင်ပါတယ်။ ဗီတာမင်စီက အချဉ်အရသာရှိတဲ့ အသီးတွေမှာ များစွာ ပါဝင်ပါတယ်။ အောက်ပါတို့မှာလည်း များစွာပါဝင်ပါတယ်။
– ဟင်းနုနယ်
– ကိုက်လန်
– ငရုပ်ပွသီး
– စတော်ဘယ်ရီ
– မာလကာသီး
– သင်္ဘောသီး
ဗီတာမင် စီက ဟင်းသီးဟင်းရွက်နဲ့ သစ်သီးဝလံတွေမှာ များစွာပါဝင်တာမို့ အ များစုက ဗီတာမင်စီကို ဆရာဝန်မညွှန်ကြားဘဲ အားဖြည့်ဆေးအနေနဲ့ မှီဝဲစရာ မလို အပ်ပါဘူး။

♦ ဗီတာမင် အီး
သူက ဗီတာမင် စီလိုမျိုး အစွမ်းထက်ဓာတ်တိုးဆန့်ကျင်ပစ္စည်း ဖြစ်တာကြောင့် ရောဂါပိုးတွေကို တိုက်ထုတ်ဖို့ ကူညီနိုင်ပါတယ်။ ဗီတာမင်အီးရရှိဖို့ ဗာဒံစေ့၊မြေပဲ၊ နေကြာစေ့၊ နေကြာဆီ၊ မြေပဲဆီ၊ ပဲပိစပ်ဆီ တို့ကို စားသုံးပါ။

♦ ဗီတာမင် အေ
ဒီဗီတာမင်က ရောဂါပိုးကို တိုက်ထုတ်နိုင်ပါတယ်။ ငါး၊ အသားနဲ့ နို့နဲ့နို့ထွက်ပစ္စည်း လိုမျိုး တိရစ္ဆာန်ထုတ်ကုန်မှရရှိနိုင်သလို အပင်ထုတ်ကုန်မှ ကရိုတီနွိုက်အဖြစ်ရရှိ နိုင်ပါတယ်။ အထူးသဖြင့် တူနာငါးမှာ ဗီတာမင် အေ အများအပြား ပါဝင်ပါတယ်။
မုန်လာဥနီ၊ ကန်စွန်းဥ၊ ရွှေဖရုံသီးလိုမျိုး အဝါရောင်၊ လိမ္မော်ရောင် အစားအစာ တွေမှာ ကရိုတီးနွိုက် များစွာပါဝင်ပါတယ်။

♦ ဗီတာမင် ဒီ
နေရောင်ခြည်ကရရှိတဲ့ ဗီတာမင် ဒီက ခုခံအားစနစ်အတွက် အရေးကြီးဆုံးနဲ့ အစွမ်းထက်ဆုံး အာဟာရဖြစ်ပါတယ်။ ဆော်လမွန်၊ တူနာနဲ့ ငါးသေတ္တာ၊ ဗီတာမင် ဒီ အားဖြည့်ကွေကာ၊ လိမ္မော်ရည်နဲ့ နွားနို့တွေထဲမှာ ဗီတာမင် ဒီ ပါဝင်ပါတယ်။
ဗီတာမင် ဒီကလွဲပြီး ဗီတာမင်အများစုက အစားအစာကနေ ရရှိနိုင်ပါတယ်။ ဗီ တာမင် ဒီက ချို့တဲ့နိုင်တာမို့ အားဖြည့်ဆေးအနေနဲ့ မှီဝဲနိုင်ဖို့ ဆရာဝန်နဲ့ ဆွေးနွေးပါ။

♦ ဖောလစ်အက်စစ်
ဖောလိတ် ဒါမှမဟုတ် ဖောလစ်အက်စစ်က ကျန်းမာရေးအတွက် အကျိုးများစွာ ရှိတာမို့ သူ့ကို လုံလုံလောက်လောက်ရရှိအောင် ပဲအမျိုးမျိုး၊ အစိမ်းရောင်ဟင်းရွက်နဲ့ ထောပတ်သီးစားပါ။

♦ သံဓာတ်
သံဓာတ်က ဆဲလ်အတွင်း အောက်ဆီဂျင်ရရှိအောင် ကူညီပေးပြီး ခုခံအားစနစ် လုပ်ငန်းစဉ်မှာ တစ်စိတ်တစ်ဒေသပါဝင်ပါတယ်။ ခန္ဓာကိုယ်က အနီရောင်အသား၊ ကြက်သား၊ ကြက်ဆင်သား၊ ငါးသေတ္တာ၊ ခုံး၊ ကမာကောင်လိုမျိုး အသားဓာတ်ကရရှိတဲ့ သံဓာတ်ကို စုပ်ယူမှု ပိုကောင်းမွန်ပါတယ်။
သက်သတ်လွတ်စားသုံးသူတွေကလည်း ပဲအမျိုးမျိုး၊ ဘရိုကိုလီ၊ ကိုက်လန်တို့မှ သံဓာတ်ရရှိနိုင်ပါတယ်။

♦ ဆီလီနီယမ်
ဆီလီနီယမ်က ခုခံအားစနစ်အတွက်အစွမ်းထက်ပြီး ရောဂါပိုး မဝင်ရောက်နိုင် အောင် ကာကွယ်ပေးပါတယ်။ အသားမှများစွာရရှိနိုင်ပေမယ့် Brazil nuts တစ်စေ့မှာ သတ်မှတ်ထားတဲ့ နေ့စဉ်လိုအပ်ချက် ၁၀၀ ရာခိုင်နှုန်း ပါဝင်ပါတယ်။ ပင်လယ်စာ (တူနာ၊ ငါးသလောက်၊ ငါးသေတ္တာ)၊ အသားနဲ့ အသည်း၊ ကြက်သားနဲ့ ဒိန်ခဲတွေမှာ ဆီလီနီယမ် များစွာပါဝင်ပါတယ်။

♦ သွပ်
သွပ်ဓာတ်က ခုခံအားဆဲလ်အသစ်ထုတ်လုပ်ဖို့ အတွက်လိုအပ်ပါတယ်။ ဂုံး၊ ကမာ၊ ဂဏန်း၊ ကြက်ဆင်သားနဲ့ အဆီမပါတဲ့အသားလိုမျိုး တိရစ္ဆာန် ထုတ်ကုန်တွေမှာ များစွာပါဝင်ပါတယ်။ ဆင်ခေါင်းပဲနဲ့ ဒိန်ချဉ်စားသုံးရာမှလည်း သွပ်ဓာတ်ကို ရရှိနိုင်ပါ တယ်။
ဖော်ပြပါ ဗီတာမင်အများစုက ဟင်းသီးဟင်းရွက်၊ သစ်သီးဝလံနဲ့ ကျန်းမာရေးနဲ့ ညီညွတ်တဲ့အစားအစာတွေက ရရှိနိုင်ပေမယ့် အများစုကလုံလောက်အောင် မစားသုံး တတ်ကြတဲ့အတွက် စားသုံးကြပါလို့ တိုက်တွန်းလိုက်ပါတယ်။

ဒေါက်တာခင်မိုးမိုး

Post Author: Good Health Journal