ရင်သားမှာ အကျိတ်မဟုတ်ဘဲ အန္တရာယ်မပေးနိုင်တဲ့ အရည်အိတ်လေး ဖြစ်လာတဲ့အခါ ကုသမှုတွေလုပ်ဖို့လည်း မလိုအပ်သေးဘူးဆိုရင် စားသောက်ပုံတွေကို ပြောင်းလဲကျင့်သုံးဖို့ လိုအပ်ပါတယ်။ ခန္ဓာကိုယ်တွင်းက ဟော်မုန်းပမာဏနဲ့ ရာသီစက်ဝန်းအပေါ်မူတည်ပြီး အပြောင်းအလဲတွေ ဖြစ်ပေါ်နိုင်တယ်ဆိုပေမယ့် သဘာဝအတိုင်း အစားအသောက်တွေကို စားသောက်နေထိုင်မယ်ဆိုရင်တော့ အကောင်းဆုံးပါ။
ဂေါ်ဖီထုပ်အနွယ်ဝင် ဟင်းသီးဟင်းရွက်
ဆာလဖာပါဝင်တဲ့ ဟင်းသီးဟင်းရွက်တွေကို စားသုံးမယ်ဆိုရင် ခန္ဓာကိုယ်တွင်း အဆိပ်အတောက်တွေကို ဓာတ်ပြယ်စေပြီး အန္တရာယ်မပေးတဲ့ ရင်သား အရည်အိတ်ကို ဖယ်ရှားပေးပါတယ်။ အမျိုးသမီးအများစုက ဂေါ်ဖီထုပ်၊ ပန်းဂေါ်ဖီစိမ်း၊ ကိုက်လန်၊ ဂေါ်ဖီပန်းပွင့်၊ မုန်ညင်း၊ မုန်လာထုပ် စတာတွေ စားသုံးတဲ့အခါ ရင်သားအကျိတ်ကြောင့် နာကျင်မှုနဲ့ တင်းတာတွေ လျော့နည်းသက်သာစေတယ်လို့ ပြောဆိုကြပါတယ်။
ဗီတာမင် အေ ကြွယ်ဝတဲ့ အစားအစာ
လေ့လာမှုတွေအရ ဗီတာမင် အေ ဖြည့်စွက်သောက်သုံးမယ်ဆိုရင် ရင်သားအရည်အိတ်ဖယ်ရှားနိုင်မှာ ဖြစ်ပါတယ်။ ဗီတာမင် အေကို ဖြည့်စွက်သောက်သုံးဖို့ လိုအပ်သလားဆိုတာကတော့ မေးစရာရှိပါတယ်။ ကန်စွန်းဥ၊ အစိမ်းရင့်ရောင်ဟင်းသီးဟင်းရွက်တွေဖြစ်တဲ့ ကိုက်လန်၊ ဟင်းနုနယ်ရွက်၊ ကညွတ်၊ သခွားမွှေး၊ ပန်းငရုတ်ပွစိမ်း၊ မုန်လာဥနီ စတာတွေမှာ ဗီတာမင် အေ ကြွယ်ဝစွာ ပါဝင်ပါတယ်။
ဗီတာမင် အီး ကြွယ်ဝတဲ့ အစားအစာ
ရင်သားမှာဖြစ်တဲ့အရည်အိတ် သက်သာစေဖို့ အကောင်းဆုံးက ဗီတာမင် အီးပါ။ ကိုယ်တွင်းရောင်ရမ်းမှုတွေကို သက်သာစေပြီး အိုမင်းရင့်ရော်မှုကိုလည်း တားဆီးပေးပါတယ်။ တိုဟူး၊ ဟင်းနုနယ် ရွက်၊ အစေ့အဆန်၊ အခွံမာသီး၊ ထောပတ်သီး၊ ငါး၊ ကမာကောင်၊ ရွှေဖရုံသီး စတဲ့ အစားအစာတွေမှာ ဗီတာမင် အီးတွေ များစွာပါဝင်ပါတယ်။
ဆား ပါဝင်မှုနည်းတဲ့ အစားအစာ
စားသုံးတဲ့ အစားအစာထဲမှာ ဆိုဒီယမ်ဆားတွေ ပါဝင်မှုများတာကြောင့် ခန္ဓာကိုယ်ထဲကို ရေပြန်ဆွဲပြီး ရင်သားအရည်အိတ်ဖြစ်ပေါ်မှုကို အားပေးပါတယ်။ တစ်နေ့ကို ဆားပမာဏ ၁၅၀၀ မီလီဂရမ်အောက် လျော့နည်းပြီး ဆားကို စားသုံးတာ အကောင်းဆုံးလို့ အမေရိကန် နှလုံးရောဂါအဖွဲ့က ပြောထားပါတယ်။ သစ်သီးနဲ့ ဟင်းသီးဟင်းရွက်တွေကို များများစားသုံးမယ်ဆိုရင်လည်း ခန္ဓာကိုယ်တွင်း ဆားပမာဏကို လျှော့ချပေးပါတယ်။ အစားအသောက်တွေ ဝယ်ယူတဲ့အခါမှာလည်း ဆားပါဝင်မှုနည်းတာကို ရွေးချယ်ဝယ်ယူဖို့ လိုပါတယ်။
အမျှင်ဓာတ်များတဲ့ အစားအစာ
မဟော်မုန်း အီစထရိုဂျင်တွေကို အူလမ်းကြောင်းကနေ မဖယ်ရှားနိုင်ဘဲ များတာက ရင်သားအရည်အိတ်ကို ဖြစ်စေနိုင်တယ်လို့ ပညာရှင်တွေက ပြောပါတယ်။ လေ့လာမှုတွေအရ တစ်ပတ်ကို ဝမ်း ၃ ကြိမ်အောက်နည်းပြီးသွားတဲ့ အမျိုးသမီးတွေက အူလမ်းကြောင်းကောင်းမွန်ပြီး ဝမ်းပုံမှန်သွားတဲ့ အမျိုးသမီးတွေထက် ရင်သားအရည်အိတ် ဖြစ်နိုင်ခြေ ပိုများပါတယ်။ ဒါပေမဲ့ အမျှင်ဓာတ်များတဲ့ ပဲအမျိုးမျိုး၊ ပဲနွယ်ပဲညွန့်၊ ဂေါ်ဖီထုပ်၊ ပန်းဂေါ်ဖီစိမ်း၊ ဘယ်ရီသီး၊ သစ်တော်သီး၊ အုတ်ဂျုံ၊ ဆန်လုံးညို၊ နှမ်းကြတ်စေ့၊ ချီရာစေ့ စတာတွေကို စားသုံးမယ်ဆိုရင် အူလမ်းကြောင်းလှုပ်ရှားမှုကောင်းမွန်စေလို့ ဝမ်းချုပ်တာ ကင်းဝေးစေပါတယ်။
ပြည့်ဝဆီနည်းတဲ့ အစားအစာ
ပြည့်ဝဆီများတဲ့ အစားအစာတွေ က ခန္ဓာကိုယ်တစ်ခုလုံးရဲ့ ကျန်းမာရေးကို ထိခိုက်စေပါတယ်။ ဒါ့ပြင် ပြည့်ဝဆီတွေက အီစထရိုဂျင် ထုတ်လုပ်မှုကို အား ပေးပြီး ရင်သားအရည်အိတ်ကြီးထွားလာ စေဖို့ အားပေးပါတယ်။ အနီရောင်အသားနဲ့ အသားတွေကို ပြုပြင်ပြီး ပြုလုပ်ထားတဲ့အစားအစာတွေ စားသုံးတာကို ရှောင်သင့်ပါတယ်။ အရေခွံမပါတဲ့ ကြက် ရင်အုံသားနဲ့ အိုမီဂါ-၃ ကြွယ်ဝတဲ့ အဆီ များတဲ့ငါးတွေစားသုံးမယ်ဆိုရင် ကိုယ်တွင်းရောင်ရမ်းမှုတွေ လျော့နည်းသွားစေပါတယ်။ သစ်သီးနဲ့ ဟင်းသီးဟင်းရွက်တွေမှာလည်း ပြည့်ဝဆီတွေ မပါဝင်တာကြောင့် ဒါတွေကိုလည်း စားသုံးရမှာ ဖြစ်ပါတယ်။
ရေနဲ့ သစ်သီးဖျော်ရည်
အရေးကြီးဆုံးက ကိုကာကိုလာ၊ ကော်ဖီ၊ ဘီယာ၊ ဝိုင် စတာတွေကို ရှောင်ကြဖို့ အရေးကြီးပါတယ်။ ဒါတွေက ရင်သားအရည်အိတ်ကို ပိုမိုကြီးထွားစေတဲ့ အပြင် နောက်ဆက်တွဲလက္ခဏာရပ်တွေပါ ပိုမိုခံစားရစေပါတယ်။ ရေကို ပြည့်ပြည့်၀၀သောက်သုံးမယ်ဆိုရင် ခန္ဓာကိုယ်မှာ ရေဓာတ်ပြည့်ဝစေတဲ့အပြင် ကိုယ်တွင်းအဆိပ်အတောက်တွေကိုလည်း ကင်းရှင်းစေပါတယ်။ အသီးအနှံတွေကို သင့်အိမ်မှာပဲ သဘာဝအတိုင်း ဖျော်ရည်လုပ်ပြီးသောက်မယ်ဆိုရင် ဗီတာမင်၊ သတ္တုဓာတ်၊ အမျှင်ဓာတ်နဲ့ အင်တီအောက်ဆီးဒင့်တွေကို ရရှိစေပါတယ်။
ဇာခြည်ဝင်း (ဆေးဝါးတက္ကသိုလ်)
