သင့်နှလုံးကျန်းမာရေး အစဉ်အမြဲကောင်းမွန်စေရန်

ကျွန်မတို့ဟာ နှလုံးကျန်းမာရေးကောင်းမွန်ဖို့အတွက် အခြေခံအချက်တွေ သိရှိနေကြပေမယ့် တချို့အမူအကျင့်တွေက နှလုံးကျန်းမာရေးကို ထိခိုက်စေနိုင်တယ်ဆိုတာကို မသိရှိတဲ့အတွက် ဆက်လက်ကျင့်သုံးနေတတ်ကြပါတယ်။ သင့်နှလုံးကျန်းမာရေး အစဉ်အမြဲကောင်းမွန်ဖို့ လိုက်နာရမယ့်အောက်ပါအချက်တွေကို ဖော်ပြလိုက်ပါတယ်။

၁။ သင့်ကို ဒုက္ခပေးမယ့်အဆီကို နားလည်ပါ
အဆီအမျိုးမျိုးရှိကြတဲ့အထဲ လူအများစုကတော့ တစ်ခုနဲ့တစ်ခု ကွဲပြားခြားနားတယ်ဆိုတာကို မသိရှိကြပါဘူး။ အဆီထဲမှာ အဆိုးဆုံးကတော့ ထပ်ပြန်ကြော်ဆီပဲ ဖြစ်ပါတယ်။ စမူဆာ၊ အီကြာကွေး၊ ဘူးသီးကြော်လိုမျိုး ထပ်ကာထပ်ကာ ပြန်လည် အသုံးပြုထားတဲ့ ဆီနဲ့ ကြော်ထားတဲ့ အကြော်စာတွေ၊ အဆင်သင့်စားလို့ရတဲ့အစားအစာတွေ၊ ပြုပြင်ထားတဲ့အစားအစာတွေ၊ ကိတ်မုန့် ကွတ်ကီလိုမျိုး ဖုတ်ထားတဲ့ အစားအစာတွေ အားလုံးမှာ ထပ်ပြန်ကြော်ဆီတွေ ပါဝင်နေပါတယ်။ ဒီထပ်ပြန်ကြော်ဆီတွေက သင့်ခန္ဓာကိုယ်ထဲက ကိုလက်စထရောအဆင့်တွေကို မြင့်မားစေတဲ့အပြင် HDL လို့ခေါ်တဲ့ ကောင်းတဲ့ကိုလက်စထရောအဆင့်တွေကို လျှော့ချပေးပါတယ်။ ဒါကြောင့် ဆီကို အသုံးပြုမယ်ဆိုရင် ကျန်းမာရေးကောင်းမွန်စေတဲ့ သံလွင်ဆီ၊ နေကြာဆီလိုမျိုး မပြည့်ဝဆီတွေကိုသာ စားသုံးပါ။

၂။ တစ်ချိန်တည်းမှာ အကြာကြီး မထိုင်ပါနဲ့
ကျွန်မတို့အများစုဟာ ထိုင်ပြီး စားပွဲမှာ အလုပ်လုပ်ရတာများကြပါတယ်။ အချိန် အကြာကြီးထိုင်တာက နှလုံးကျန်းမာရေးအတွက် အလွန်အမင်း အန္တရာယ်ရှိပါတယ်။ လေ့လာမှုအရ နှလုံးသွေးကြောရောဂါဖြစ်နိုင်ခြေ ၁၄၇ ရာခိုင်နှုန်း ရှိပါတယ်တဲ့။ အဲဒီ ရောဂါကြောင့် သေဆုံးနှုန်းဟာလည်း နှစ်ဆခန့် ပိုများပါတယ်။

၃။ တစ်ဆင့်ခံဆေးလိပ်ငွေ့မရှူမိပါစေနဲ့
သင်ဟာ ဆေးလိပ်မသောက်ပေမယ့်လည်း သင်ရဲ့ မိသားစုဝင် ဒါမှမဟုတ် သင်ရဲ့ မိတ်ဆွေအပေါင်းအသင်းတွေက ဆေးလိပ်သောက်နေရင် သင့်မှာ နှလုံးရောဂါဖြစ်နိုင်ခြေ အလွန်မြင့်မားပါတယ်။ အလုပ် ဒါမှမဟုတ် အိမ်မှာ တစ်ဆင့်ခံဆေးလိပ်ငွေ့ ရှူရသူတွေက နှလုံးရောဂါဖြစ်နိုင်ခြေ ၃၀ ရာခိုင်နှုန်း မြင့်မားပါတယ်။ သင့်မှာ သွေးတိုးရောဂါရှိနေရင် ရောဂါဖြစ်နိုင်ခြေက ပိုပြီးတော့ များသွားပါလိမ့်မယ်။

၄။ သွားကျန်းမာရေးကို ဂရုစိုက်ပါ
လူအများစုက သွားကျန်းမာရေးနဲ့ နှလုံးကျန်းမာရေး ဆက်စပ်မှုရှိတယ်ဆိုတာ မသိရှိကြသေးပါဘူး။ သွားဖုံးကျန်းမာရေးနဲ့ နှလုံးရောဂါဖြစ်နိုင်ခြေ များတဲ့အချက်တွေက အတူတူပါပဲ။ သင်ဟာ သွားဖုံးကျန်းမာရေးမကောင်းသူဖြစ်ရင် နှလုံးရောဂါလည်း ဖြစ်လာမှာပါ။ ဘာကြောင့်လဲဆိုတော့ သွားဖုံးရောဂါဖြစ်စေတဲ့ ဘက်တီးရီးယားတွေက သွေးကြောအတွင်း လှည့်ပတ်သွားလာနေတဲ့အတွက် သွေးကြောတွေကို ရောင်ရမ်းမှု ဖြစ်စေတဲ့ C-reactive Proteins အဆင့်တွေကို မြင့်တက်သွားစေတာကြောင့်ပါ။

၅။ အိပ်စက်ချိန် ခုနစ်နာရီရှိပါစေ
အိပ်ချိန်က အနည်းဆုံး ခုနစ်နာရီရှိရပါမယ်။ လေ့လာမှုအရ အိပ်ချိန် ခြောက်နာရီ ထက်နည်းသူတွေက နှလုံးတိုက်ခိုက်ခံရတာနဲ့ လေဖြတ်တာအပါအဝင် နှလုံးသွေးကြောရောဂါဖြစ်နိုင်ခြေ နှစ်ဆ ပိုများတယ်လို့ သိရပါတယ်။ အိပ်ရေးမဝတာကြောင့် ဇီဝရုပ်ဖြစ်စဉ်ကို အနှောင့်အယှက်ပေးနိုင်တဲ့အတွက် သွေးဖိအားနဲ့ နှလုံးကျန်းမာရေး အခြေအနေပေါ်မှာ သက်ရောက်မှုရှိတယ်လို့ ဆိုပါတယ်။

၆။ သင်ရဲ့ သွေးဖိအားအမှတ်ကို သိရှိထားပါ
ကျွန်မတို့ရဲ့ ထက်ဝက်လောက်က ကိုယ်ရဲ့သွေးဖိအားအမှတ် ဘယ်လောက်ရှိတယ်ဆိုတာကို မသိရှိကြပါဘူး။ အသက် ၁၈ နှစ်နဲ့ ၃၀ ကြားအရွယ်က သုံးနှစ်မှ ငါးနှစ် တစ်ကြိမ် သွေးဖိအား တိုင်းတာသင့်ပြီး ဒီထက်အသက်ကြီးသူဖြစ်ရင် နှစ်စဉ် သွေးဖိအား တိုင်းထားသင့်ပါတယ်။

၇။ နားကြပ်ဖြုတ်ထားပါ
ကျယ်လောင်သံတွေက နှလုံးအခြေအနေကို ဆိုးရွားစေပါတယ်။ လေ့လာမှုအများအပြားအရ ကားသံ၊ ဆူညံတဲ့သီချင်းသံလိုမျိုး ကျယ်လောင်တဲ့အသံတွေက နှလုံးခုန်နှုန်းမြန်စေပြီး သွေးဖိအားမြင့်တက်လာနိုင်စေတယ်လို့ သိရပါတယ်။ အဲဒီအစား ငြိမ့််ညောင်းတဲ့သီချင်းသံတွေ နားထောင်တာက သင်ရဲ့ စိတ်နဲ့ခန္ဓာကိုယ်ကို အေးချမ်းမှု ရရှိစေနိုင်ပါတယ်။

၈။ ည ၈ နာရီနောက်ပိုင်း အီလက်ထရွန်နစ်ပစ္စည်းတွေ အသုံးမပြုပါနဲ့
အီလက်ထရွန်နစ်ပစ္စည်းတွေက သင့်ကျန်းမာရေးကို ဒုက်္ခပေးနိုင်ပါတယ်။ ဒီပစ္စည်းတွေက ထွက်လာတဲ့ အပြာရောင်ရောင်ခြည်တန်းဟာ ကင်ဆာရောဂါ၊ ဆီးချိုရောဂါနဲ့ နှလုံးရောဂါဖြစ်နိုင်ခြေကို သိသိသာသာ မြင့်မားစေပါတယ်။ ဒါ့အပြင် အိပ် စက်မှုကိုလည်း အနှောင့်အယှက်ပေးတတ်ပါတယ်။

၉။ နှလုံးကျန်းမာရေးနဲ့ ညီညွတ်တဲ့အစားအစာ စားပါ
ဆိုလိုတာက လတ်ဆတ်တဲ့သစ်သီး၊ ဟင်းသီးဟင်းရွက်၊ သစ်သီးခြောက်၊ အစေ့နဲ့ အဆန်တွေကို နေ့စဉ် ငါးပုံပြည့်အောင် စားပေးရပါမယ်။ ကွတ်ကီ၊ ပေါင်မုန့် ဖြူလိုမျိုး ပြုပြင်ထားတဲ့အစားအစာတွေကို မစားပါနဲ့။ အဆိုးဆုံးဖြစ်တဲ့ ဆော်ဒါပါဝင် တဲ့ အချိုရည်တွေကို လုံးဝရှောင်ကြဉ်ရပါမယ်။

၁၀။ တစ်ကြိမ်ကို မိနစ် ၃၀ နဲ့ တစ်ပတ် ငါးကြိမ် လေ့ကျင့်ခန်း ပြုလုပ်ပါ
နှလုံးကျန်းမာရေးကောင်းစေဖို့အတွက် လေ့ကျင့်ခန်းလုပ်ဖို့ လိုကို လိုအပ်ပါတယ်။ ယောဂကျင့်စဉ်ပြုလုပ်တာ၊ ကတာ၊ ရေကူးတာ၊ လမ်းမြန်မြန်လျှောက်တာ ဒါမှမဟုတ် စက်ဘီးစီးတာလိုမျိုး လေ့ကျင့်ခန်းတွေကို တစ်ကြိမ်ကို မိနစ် ၃၀ နှုန်းနဲ့ အနည်းဆုံး တစ်ပတ် ငါးကြိမ် ပြုလုပ်ပါ။ ဒါက WHO က အသက် ၁၈ နှစ်နဲ့ ၆၄ နှစ်အကြားတွေအတွက် သတ်မှတ်ပေးထားတဲ့ လေ့ကျင့်ခန်းစံနှုန်းပါ။ သင်က အားကစားခန်းမမှာ ပြင်းထန်တဲ့လေ့ကျင့်ခန်းတွေ ပြုလုပ်မယ်ဆိုရင် အချိန်အတိုင်းအတာကို ထက်ဝက်အထိ လျှော့ချလို့ ရပါတယ်။ တစ်ပတ်ကို ၇၅ မိနစ် ဒါမှမဟုတ် တစ်ကြိမ်ကို ၁၅ မိနစ်နဲ့ တစ်ပတ် ငါးရက် ပြုလုပ်ပေးရပါမယ်။ ဒီလို လေ့ကျင့်ခန်းပြုလုပ်တာကြောင့် နှလုံးသွေးကြောရောဂါကို ကာကွယ်နိုင်ရုံသာမက စိတ်ကျဝေဒနာ၊ Metabolic လက္ခဏာစု၊ ကျောရိုးကျိုးရောဂါ၊ အူမကြီးနဲ့ သားမြတ်ကင်ဆာလိုမျိုး ရောဂါအများစုကိုပါ ကာကွယ်နိုင်ပါတယ်။

♥ ဒေါက်တာခင်မိုးမိုး ♥

Good Health Journal

Post Author: Good Health Journal

Leave a Reply

Your email address will not be published.