အိပ်စက်အနားယူတာဟာ လူတစ်ယောက်ရဲ့ရုပ်ပိုင်းဆိုင်ရာရော၊ စိတ်ပိုင်းဆိုင်ရာကျန်းမာမှုအတွက်ပါ အရေးကြီးတဲ့ထောက်တိုင်တစ်ခုဖြစ်ပြီး အသက်ကြီးလာတာနဲ့အမျှ ပိုပိုပြီးဂရုစိုက်ဖို့လိုအပ် လာပါတယ်။ လူတစ်ယောက်အသက်ကြီးလာတဲ့အချိန်မှာ အိပ်စက်တဲ့ပုံစံတွေပြောင်းလဲလာပါတယ်။ ညနေဘက်အစောကြီး အိပ်ငိုက်နေတာ၊ နှစ်နှစ်ခြိုက်ခြိုက် အိပ်မပျော်တာ၊ မနက်ဆိုရင်လည်း အစောကြီးနိုးနေတာမျိုးတွေကိုကြုံတွေ့ရတာဖြစ်ရိုးဖြစ်စဉ်တစ်ခုပါပဲ။ ဒါပေမဲ့ အိပ်မပျော်တဲ့ပြဿနာတွေဟာ ဆက်တိုက်ဖြစ် လာတာ၊ မနက်အိပ်ရာနိုးလာတဲ့အချိန်မှာ လန်းလန်းဆန်းဆန်း မရှိတာမျိုးတွေကတော့ ပုံမှန်တွေ့နေကျအိပ်မပျော်တဲ့ ပြဿနာတွေ မဟုတ်တော့ပါဘူး။
လူတစ်ယောက်အဖို့ အသက်ကြီး ကြီးငယ်ငယ်၊ အမျိုးသား အမျိုးသမီးမရွေး ကောင်းစွာအိပ်စက်နိုင်တာဟာ အရေးကြီးတဲ့ အလေ့အထကောင်းတစ်ခု ဖြစ်ပါတယ်။ ညဘက်မှာ နှစ်နှစ်ခြိုက်ခြိုက် အိပ်ပျော်တာဟာ လူတစ်ယောက်ရဲ့ အာရုံစိုက်နိုင်စွမ်းရည်နဲ့ မှတ်ဉာဏ်ကို ပိုမိုဖွံ့ဖြိုးစေပါတယ်။ နေ့အချိန်မှာ ပျက်စီးသွားတဲ့ဆဲလ်အမျိုးမျိုးကို ပြန်လည်ပြုပြင်နိုင်သလို ကိုယ်ခံစွမ်းအားကိုလည်း မြင့်တက်လာစေကာ ကူးစက်ရောဂါတွေကိုကောင်းကောင်းတွန်းလှန်နိုင်ပါတယ်။ ဒါကြောင့်ပဲ ဆရာဝန်တွေဟာ လူနာတစ်ယောက်ရဲ့ရောဂါကို ခြေရာခံလိုက်တဲ့အချိန်မှာ ကောင်းကောင်းအိပ်ပျော်ရဲ့ လားဆိုတာကို အမြဲတမ်းထည့်မေးဖြစ်ကြ ပါတယ်။
အသက်ကြီးလာတဲ့အချိန်မှာ အိပ်ချိန်တွေ ဘယ်လိုပြောင်းလဲလာသလဲ။
လူတစ်ယောက်ဟာ အသက်ကြီးလာတဲ့အချိန်မှာ လူတစ်ယောက်ရဲ့ ကြီးထွားမှုဟော်မုန်းGrowth Hormone ထုတ်လုပ်မှုဟာ နည်းသွားပြီးတော့ နှစ်နှစ်ခြိုက်ခြိုက်အိပ်ချိန်တွေ နည်းသွားတတ်ပါတယ်။ တစ်ချိန်တည်းမှာပဲ Melatonin ထုတ်လုပ်မှုနည်းသွားပြီး အိပ်ချိန်ပုံစံတွေပြောင်းလဲသွားကာ ညအချိန်မှာပဲ ခဏခဏနိုးနေတတ်ပါတယ်။ လူတစ်ယောက်ကို ဘယ်အချိန်အိပ်ရမယ်၊ ဘယ်အချိန်မှာထရမယ်ဆိုတာကို ညွှန်းဆိုနေတဲ့ ခန္ဓာကိုယ်စည်းချက် Circadian Rhythmကလည်း ပြောင်းလဲသွားတာကြောင့် ညနေဘက်မှာဆိုရင် အစောကြီး အိပ်ချင်နေတတ်ပြီး မနက်ဘက်မှာလည်း အစောကြီးနိုးနေတတ်ပါတယ်။ ဒါကြောင့်ပဲ အသက်ကြီးလာတဲ့အချိန်မှာ လုံလောက်တဲ့အိပ်စက်ချိန်ရနိုင်ဖို့၊ အနားယူနိုင်ဖို့အိပ်ရာထဲမှာ လဲလျောင်းပေးနေဖို့လိုအပ်သလို နေ့အချိန်မှာလည်း တရေးတမောအိပ်ဖို့လည်းလိုပါတယ်။
လူတစ်ယောက်ဟာ ဘယ်အသက်အရွယ်မှာမဆို အိပ်စက်ချိန်နဲ့ ပတ်သက်တဲ့ပြဿနာတွေ ကြုံတွေ့ရတာဟာ ပုံမှန်ပါပဲ။ ဒါပေမဲ့ လူကြီးတွေမှာ ပုံမှန်မဟုတ်တဲ့လက္ခဏာတွေပြလာရင်တော့ ပိုပြီးတော့ ဂရုစိုက်ရပါလိမ့်မယ်။ အရမ်းပင်ပန်းနေပေမယ့် ကောင်းကောင်းအိပ်မပျော်တာ၊ ညဘက်အိပ်ရာကနိုးလာပြီးတဲ့ နောက်ပိုင်းမှာ ပြန်အိပ်ပျော်ဖို့ခက်ခဲတာ၊ မနက်တိုင်းမှာ လန်းလန်းဆန်းဆန်းဖြစ်မနေတာမျိုးတွေဟာ သတိထားရမယ့် အချက်တွေပါပဲ။ ညဘက်ကောင်း ကောင်း အိပ်ပျော်နိုင်ဖို့အိပ်ဆေးတွေ၊ အရက်တွေသောက်ရတာ၊ စိတ်ခံစားမှုကိုထိန်းချုပ်နိုင်မှုတွေနည်းလာတဲ့အခါမှာလည်း သတိထားဖို့လိုအပ်ပါတယ်။ ဒါတွေအပြင် နေ့ခင်းပိုင်းမှာအိပ်ငိုက်တာ၊ စိတ်တိုလွယ်တာ၊ ငြိမ်ငြိမ်သက်သက်ထိုင် နေရတဲ့အချိန်၊ ရုပ်ရှင်ကြည့်နေတဲ့အချိန်၊ ကားမောင်းနေတဲ့အချိန်မျိုးတွေမှာ လန်းလန်းဆန်းဆန်းမရှိတာ၊ အာရုံစိုက်ဖို့ခက်ခဲတာတွေကို ခဏခဏ ကြုံလာရရင်တော့ ဆရာဝန်နဲ့ သွားရောက်တိုင်ပင်ဖို့ လိုအပ်နေပါပြီ။
ဘာတွေကလူကြီးတွေရဲ့ အိပ်ချိန်တွေကို နှောင့်ယှက်ဟန့်တားနေပါသလဲ။
လူကြီးတစ်ယောက်ကို အိပ်မပျော်ဖြစ်စေတဲ့အကြောင်းအရင်းတွေကတော့ အများကြီးရှိနေပါတယ်။ စိတ်ပိုင်းဆိုင်ရာ ပြဿနာတွေဖြစ်တဲ့ စိတ်ဖိစီးမှု၊ စိုးရိမ်ပူ ပန်မှု၊ စိတ်ကျရောဂါတွေဟာ အိပ်မပျော် ဖြစ်စေပါတယ်။ အသက် ၅၀ ကျော်တဲ့အချိန်မှာ အိပ်စက်ချိန်မမှန်တာ၊ ကောင်း ကောင်းမအိပ်ရတာ၊ နေ့အချိန်မှာစား သောက်တဲ့ အလေ့အကျင့်တွေမမှန်တာတွေဟာ ညဘက်မှာကောင်းကောင်းအိပ် မပျော်ဖြစ်စေပါတယ်။ နာကျင်မှုတွေ၊ နာတာရှည်ရောဂါတွေကိုခံစားနေရသူတွေဟာ အိပ်မပျော်ဖြစ်တတ်သလို ကျန်းမာရေး လိုအပ်မှုအရ သောက်နေရတဲ့ တချို့ ဆေးဝါးတွေဟာလည်း အိပ်ချိန်တွေကို ဟန့်တားတတ်ပါတယ်။ ဒါကြောင့်ပဲ လူတစ်ယောက်ဟာ ပုံမှန်မဟုတ်ဘဲ အိပ်မပျော်နိုင်တာမျိုး ကြုံလာရပြီဆိုရင် မိမိကိုယ်မိမိဆန်းစစ်ပြီး စနစ်တကျ ကုသမှုခံ ယူသင့်ပါတယ်။ ငယ်စဉ်တည်းက အိပ်ချိန်မမှန်တာ၊ အိပ်ရာဝင်ခါနီးအရက်သောက်တာ၊ တီဗီဖွင့်ထားပြီးတော့အိပ်တာတွေဟာအိပ်ချိန်တွေကိုလျော့နည်းစေ ပါတယ်။ အသက်ကြီးချိန်မှာဖြစ်တတ်တဲ့ ဒူးနာခါးနာတဲ့ ပြဿနာတွေ၊ မကြာခဏ ဆီးသွားချင်စိတ်ဖြစ်တာတွေဟာ အိပ်ရေး ပျက်စေသလိုအဆစ်အမျက်ကိုက်တာ၊ ဆီးချို၊ အရိုးပွရောဂါ။ ညဘက်အိပ်ချိန် ရင်ပူတာတွေ၊ သက်ကြီးအတိတ်မေ့ရောဂါတွေဟာ အိပ်ချိန်တွေနည်းသွားစေပါ တယ်။ ကိုယ်လက်လှုပ်ရှားမှုမရှိတာတွေဟာ လေးလံထိုင်းမှိုင်းလာစေပေမယ့် အိပ်ချင်စိတ်ကိုတော့ မနှိုးဆွပေးပါဘူး။ မိမိချစ်ခင်တဲ့သူတွေနဲ့ကွေကွင်းရတာ၊ မိမိဖြစ်ချင်တဲ့ဆန္ဒတွေကိုမျိုသိပ်ရတာ၊ ဝမ်းနည်းနေရတာတွေဟာ အိပ်ရေးပိုပြီးတော့ပျက်စေတတ်ပါတယ်။
အိပ်မပျော်ခြင်းရဲ့နောက်ဆက်တွဲ ပြဿနာတွေဟာ ဘာတွေလဲ။
ညဘက်ကောင်းကောင်း အိပ်မ ပျော်တဲ့လူကြီးတစ်ယောက်ဟာ စိတ်ကျရောဂါကိုခံစားရနိုင်သလိုအာရုံစိုက်နိုင် စွမ်းကျတာ၊ မှတ်ဉာဏ်ချို့တဲ့တာ၊ သူ ငယ်ပြန်လွယ်တာမျိုးတွေကြုံတွေ့ရပြီး နေ့ခင်းပိုင်းတွေမှာ အိပ်ငိုက်နေတတ်ပါတယ်။ ညဘက်ချော်လဲတာ၊ နာကျင်မှုကို တခြားသူတွေထက်ပိုပြီး ခံစားရလွယ်တာ၊ အိပ်ဆေးတွေသုံးစွဲရတာတွေလည်း များနေတတ်ပါတယ်။ အိပ်ချိန်လုံလုံ လောက်လောက်မရှိတဲ့သူတွေဟာ ကျန်းမာရေးနဲ့ပတ်သက်တဲ့ ပြဿနာတွေဟာ နှလုံးသွေးကြောနဲ့ပတ်သက်တဲ့ပြဿနာ၊ ဆီးချိုရောဂါ၊ ကိုယ်အလေးချိန်ပြောင်းလဲသွားတာလိုမျိုး ကျန်းမာရေးပြဿနာတွေကြုံတွေ့ရပြီး အမျိုးသမီးတွေမှာဆိုရင်တော့ ရင်သားကင်ဆာကိုတောင်ဖြစ်စေပါတယ်။
လူတစ်ယောက်နဲ့တစ်ယောက်အိပ် စက်ဖို့လိုအပ်နေတဲ့အချိန်တွေဟာ ကွဲပြားနေပေမယ့် လူကြီးပိုင်းတွေမှာတော့ ကျန်းမာနေတယ်ဆိုရင်တောင်မှ တစ်ညကို ၇ နာရီကနေ ၉ နာရီခွဲလောက်အထိ အိပ် ပေးဖို့လိုအပ်ပါတယ်။ ဒါပေမဲ့ တစ်ညကို ဘယ်လောက်အိပ်လိုက်တယ်ဆိုတာထက် အိပ်ရာကနိုးလာတဲ့အချိန်မှာ ဘယ်လိုနေ တယ်၊ လန်းလန်းဆန်းဆန်းရှိနေတယ်ဆို တာကပိုပြီးတော့ အရေးကြီးနေပါတယ်။ မကြာခဏနိုးနေတာ၊ နေ့ဘက်တွေမှာ သမ်းဝေနေတာတွေဟာ ညဘက်မှာ ကောင်းကောင်း အိပ်မပျော်တာရဲ့သတိပေးလက္ခဏာတွေဖြစ်ပြီး ကုသဖို့နည်းလမ်းတစ်ခုခုရှာဖွေရမယ်ဆိုတာရဲ့ လမ်းညွှန်ပါပဲ။
၄။ အိပ်စက်တဲ့အလေ့အထတွေပိုမိုတိုးတက်အောင်ဘာတွေသတိထားရမလဲ။
အသက်ကြီးလာတဲ့အချိန်မှာတစ်ဦးတည်း၊ တစ်ယောက်တည်း သီးခြားနေတာထက်မိတ်ဆွေသူငယ်ချင်းတွေ၊ မိသားစုတွေနဲ့ရင်းရင်းနှီးနှီးနေပေးပြီး အလုပ်တခုခုကိုလုပ်နေတာဟာ အသက်ကြီးလာချိန်မှာကြုံတွေ့ရတတ်တဲ့စိတ်ပိုင်းဆိုင်ရာပြဿနာတွေကိုရှောင်လွှားနိုင်သလိုညဘက်မှာကောင်းကောင်းအိပ်ပျော်နိုင်ဖို့လည်း ကူညီပေးရာ ရောက်ပါတယ်။ ဒါကြောင့်ပဲလူတစ်ယောက်ဟာ အသက်ကြီးလို့ တာဝန်ကနေ အနားယူလိုက်ပေမယ့်မိမိရဲ့လှုပ်ရှားဆောင်ရွက်နေမှုကိုရပ်တန့်မပစ်သင့်တာပါပဲ။ အဲ့ဒီလိုပဲအကောင်းမြင်စိတ်နဲ့ အနားပတ်ဝန်းကျင်မှာ ဖြစ်ပျက်နေတဲ့လောကဓံတရားကိုလက်ခံပေးနိုင်တာဟာလည်း ကောင်းကောင်းအိပ်ပျော်ဖို့ကူညီပေးပါတယ်။
ကိုယ်လက်လှုပ်ရှားမှုပြုလုပ်တာဟာ Endorphins တွေကိုပိုထွက်လာစေပြီး စိတ်ကိုပိုပြီးတော့သက်တောင့်သက်သာရှိစေသလိုစိတ်ဖိစီးမှု၊ စိတ်ဓါတ်ကျခြင်း၊ စိုးရိမ်ပူပန်စိတ်များခြင်းတို့ကလည်း သက်သာသွားစေပါတယ်။ အနောက်နိုင်ငံကလူတွေကတော့နေရောင်ခြည်နဲ့ထိတွေ့မှုနည်းရင် အိပ်မပျော်ဖြစ်စေတာကြောင့်ကောင်းကောင်းအိပ်ပျော်ဖို့အတွက်တနေ့ကိုအနည်းဆုံး ၂ နာရီလောက်နေရောင်ခံလေ့ရှိပါတယ်။ ကျွန်မတို့ဆီမှာတော့အခန်းတံခါးတွေဖွင့်၊ လိုက်ကာတွေလှပ်ထားပြီးတော့နေရောင်ကောင်းကောင်း ရအောင်ပြုလုပ်ထားသင့်ပါတယ်။ အရိပ်ရတဲ့အပင်အောက်၊ ပန်းခြံတွေထဲမှာခုံလေးထားပြီး အနားယူတာ၊ စာဖတ်တာမျိုးဟာ ညအချိန်မှာကောင်းကောင်းအိပ်ပျော်ဖို့ကူညီပေးနိုင်ကြပါတယ်။
သဘာဝအလင်းရောင်မဟုတ်တဲ့လျှပ်စစ်မီးကလာတဲ့အလင်းရောင်တွေဟာ ကျွန်မတို့ကိုအိပ်အောင်ပြုလုပ်ပေးတဲ့ Melatonin တွေခန္ဓာကိုယ်ကနေထွက်တာနည်းသွားစေပါတယ်။ ဒါကြောင့်ညအိပ်မီးသီးတွေကိုအသုံးပြုရင်ဗို့အားနည်းတဲ့မီးလုံးတွေကိုအသုံးပြုသင့်သလိုတီဗွီတွေ၊ ကွန်ပြူတာတွေကိုအိပ်ချိန်မရောက်ခင် ၁ နာရီလောက်အလိုတည်းကပိတ်ထားသင့်ပါတယ်။ အိပ်ရာထဲကိုရောက်နေမှဖုန်းအသုံးပြုတာ၊Tablet & iPad တွေကိုသုံးပြီး စာဖတ်တာမျိုးတွေဟာလည်း အိပ်ချိန်ကို ဟန့်တားပေးသလိုကြွက်သားတွေကိုတင်းလာစေတတ်ပါတယ်။
တိတ်ဆိတ်ပြီး အလင်းရောင်မဝင်တဲ့အခန်းမှာ သက်တောင့်သက်သာအိပ်စက်တာဟာ ကောင်းကောင်း အိပ်ပျော်ဖို့ကူညီပေးနိုင်ပါတယ်။ ဆူညံသံ၊ အလင်းရောင်စူးစူးနဲ့အပူချိန်မြင့်တက်တာဟာ ခဏခဏနိုးနေစေတတ်ပါတယ်။ မျက်လုံးကိုအုပ်ထားပေးမယ့် Sleep Mask တွေကိုအသုံးပြုသင့်ပါတယ်။ အိပ်ခန်းဟာ ထမင်းစားခန်းမဟုတ်သလိုတီဗွီကြည့်တဲ့နေရာ၊ ကွန်ပြူတာအသုံးပြုတဲ့နေရာတွေလည်း မဟုတ်ပါဘူး။ အိပ်ခန်းအတွင်းမှာဇိမ်ခံပစ္စည်းတွေနဲ့နည်းပညာသုံးပစ္စည်းတွေထားရှိတာဟာ အိပ်ချိန်တွေကိုလျော့ကျသွားစေပါတယ်။
နောက်ထပ် အရေးကြီးတာကပုံမှန် အိပ်ရာဝင်နိုင်ဖို့ပါပဲ။ တကယ်လို့အနားမှာအိပ်တဲ့သူရဲ့ ဟောက်သံကြောင့်အိပ်ဖို့ခက်တယ်ဆိုရင်တော့Earplugs ကိုအသုံးပြုသင့်ပါတယ်။ ညနေစောင်းတွေမှာရေခပ်အေးအေးကိုချိုးပေးတာ၊ နူးညံ့တဲ့သီချင်းသံတွေနားဆင်ပြီးအိပ်တာကလည်းလူကြီးတစ်ယောက်ကိုကောင်းကောင်းအိပ်ပျော်ဖို့ကူညီပေးနိုင်ပါတယ်။ သိပ်ပြီးတော့ပြင်းပြင်းထန်ထန်မလုပ်ရတဲ့လေ့ကျင့်ခန်းတွေ၊ ယောဂကျင့်စဉ်တွေ၊ တရားထိုင်တာတွေဟာလည်း ကြွက်သားတွေကိုပြေလျော့စေပြီး နှစ်နှစ်ခြိုက်ခြိုက်အိပ်ပျော်စေပါတယ်။ ဖြစ်နိုင်ရင်တော့အိပ်ဆေးတွေသုံးပြီး အိပ်အောင်လုပ်တဲ့အကျင့်ကိုတော့ဖျောက်နိုင်အောင်ကြိုးစားရပါလိမ့်မယ်။ အိပ်ဆေးတွေကိုကြာရှည်စွဲသုံးတာဟာ ဆန့်ကျင့်ဘက်အကျိုးဆက်အနေနဲ့အိပ်မပျော်တဲ့ပြဿနာတွေကိုတောင်မှပြန်ဖြစ်စေပါတယ်။ ဒါကြောင့်ပဲကျန်းမာရေးအရတကယ်တမ်း လိုအပ်လာပြီဆိုမှသာအိပ်ဆေးတွေကိုအသုံးပြုသင့်ပါတယ်။
နေ့လည်နေ့ခင်း တရေးအိပ်တာဟာလည်း ကောင်းတယ်ဆိုပေမယ့်သတိထားရမယ့်အချက်တွေဟာလည်း ရှိနေပါသေးတယ်။ ခန္ဓာကိုယ်ရဲ့ ဇီဝဖြစ်စဉ်တွေအရတော့ ညဘက်မှာကောင်းကောင်းအိပ်ပျော်ပြီး နေ့လယ်တွေမှာလည်း အိပ်နိုင်ဖို့အစီအစဉ်တွေရှိပြီးသားပါပဲ။ ဒါကြောင့်ညဘက်ကောင်းကောင်းအိပ်မပျော်ဘူး၊ နေ့ဘက်တွေမှာလည်း လန်းလန်းဆန်းဆန်း တက်တက်ကြွကြွ ရှိမနေဘူးဆိုရင်တော့တရေးတမောအိပ်ပေးဖို့လိုကိုလိုအပ်ပါတယ်။ ဒါပေမယ့်နေ့ခင်းအိပ်တာဟာ သိပ်ပြီးတော့အချိန်မကြာသင့်သလိုညနေဘက်ကိုလည်း ရောက်မသွား အောင်လည်း သတိထားဖို့လိုအပ်ပါတယ်။ နေ့ခင်းဘက်မှာအိပ်တာဖြစ်တာကြောင့် အလင်းစူးစူးမဝင်ဘဲ သက်တောင့်သက်သာရှိတဲ့နေရာမျိုးလည်း ဖြစ်နေဖို့လိုပါတယ်။
၄။ အိပ်ရေး၀၀အိပ်နိုင်ဖို့ဘယ်လိုအစားအသောက်တွေကိုသတိထားသင့်သလဲ။
ငယ်တဲ့အချိန်တုန်းကတော့ကဖင်း၊ အရက်ပါတဲ့အစားအသောက်တွေဟာ သိပ်ပြီးတော့မသိသာပေမယ့်အသက်ကြီးလာချိန်မှာတော့သတိထားဖို့လိုလာပါပြီ။ တနေ့တည်းမှာကော်ဖီတွေ၊ လဘက်ရည်တွေ ၂ ခွက်လောက်သောက်တာ၊ ညနေခင်းတွေမှာသောက်တာမျိုးတွေကိုရှောင်ဖို့တော့လိုလာပါပြီ။ လူငယ်တွေနဲ့မတူတာကတော့လူကြီးတွေဟာ ညဘက်ရောက်လာရင်မကြာခဏဗိုက်ဆာတတ်ပါတယ်။ ဒါကြောင့်ပဲအိမ်မှာလူကြီးတွေရှိတယ်ဆိုရင်ခရက်ကာ၊ ကွေကာ၊ ဒိန်ချဉ်၊ နွားနို့တို့ကိုဆောင်ထားဖို့လိုပါတယ်။ အိပ်ရာမဝင်ခင်အချိန်မှာ ထမင်းတွေအများကြီးစားတာ၊ အပူအစပ်တွေအစားများတာကိုတော့ရှောင်ဖို့လိုအပ်ပါတယ်။ အစာမကြေနိုင်တာ၊ ဝမ်းဗိုက်မှာမအီမသသာဖြစ်တာတွေကိုပိုပြီးတော့ခံစားရစေတာကြောင့်သတိထားရပါတယ်။
အကောင်းဆုံးကတော့ အိပ်ရာမဝင်ခင် ၃ နာရီလောက်အနည်းဆုံးခွာထားပြီးတော့အစာနည်းနည်းချင်းစီသာစားသင့်ပါတယ်။ နောက်တစ်ခုသတိထားရတာကအရည်တွေအများကြီးသောက်တာပါ။ အသက်ကြီးတဲ့လူတစ်ယောက်ဟာ ရေဓါတ်ခမ်းခြောက်တာကိုကာကွယ်နိုင်ဖို့သစ်သီးဖျော်ရည်၊ ကွေကာအပါအဝင် အရည်များတဲ့အစားအသောက်တွေကိုစားသုံးပေးဖို့လိုအပ်ပါတယ်။ ဒါပေမယ့်ညနေ၊ ညဦးပိုင်းတွေမှာအရည်များများ သောက်တာတွေကိုတော့ရှောင်ရပါမယ်။ ခန္ဓာကိုယ်ထဲကိုအရည်တွေ ဝင်ရောက်လာတာများလာတာနဲ့ တပြိုက်နက်ဆီးသွားတဲ့နှုန်းလည်း များလာပါတယ်။ ဒါကြောင့်ပဲညဘက်မှာအပေါ့ခဏခဏထသွားရတာ၊ ချော်လဲတာမျိုးကိုကာကွယ်နိုင်ဖို့အတွက်ညနေဘက်မှာအရည်အများကြီးသောက်ဖြစ်တာကိုတော့ ဟန့်တားရပါလိမ့်မယ်။
လူကြီးတစ်ယောက်ဟာ အသက်အရွယ်ရလာတဲ့အချိန်မှာကောင်းကောင်း အိပ်မပျော်တဲ့အဖြစ်အပျက်ရဲ့နောက်ကွယ်မှာအကြောင်းရင်းပေါင်း များစွာတည်ရှိနေပါတယ်။ ခန္ဓာကိုယ်တည်ဆောက်ပုံအရအိပ်ချိန်တွေလျော့နည်းတာမျိုးတွေရှိနေပေမယ့်ပြင်ပအကြောင်းအရာတွေရဲ့သက်ရောက်မှုကလည်း အရေးကြီးနေပါတယ်။ ကျန်းမာရေးရှုထောင့်ကကြည့်ရင်လည်း အသက်ကြီးတဲ့အချိန်မှာကြုံတွေ့ရတဲ့ကျန်းမာရေး ပြဿနာတွေကိုတွန်းလှန်ပစ်ဖို့၊ ကိုယ်ခံစွမ်းအားကောင်းဖို့ကလည်း လူကြီးတွေဟာ အိပ်ချိန်များများရဖို့လိုအပ်ပါတယ်။ ဒါကြောင့်မို့အသက်ကြီးလာတဲ့အချိန်မှာကောင်းကောင်း အိပ်မပျော်ဘူးဆိုရင်တော့မိမိရဲ့ ဆရာဝန်နဲ့ တိုင်ပင်ဆွေးနွေးသင့်ပါတယ်။ ရောဂါတစ်ခုခုကိုခံစားနေရတာ၊ စိတ်ပိုင်းဆိုင်ရာပြဿနာတစ်ခုခုရှိနေတာ၊ ဆေးဝါးတွေရဲ့ ဘေးထွက်ဆိုးကျိုးကိုခံစားရတာမျိုးဆိုရင်လည်း ကုသမှုကိုခံယူသင့်သလိုအစားအသောက်နေထိုင်မှုပုံစံကြောင့်ဆိုရင်လည်း စောစောစီးစီး ပြုပြင်ပြောင်းလဲယူသင့်ပါတယ်။ ဒါဆိုရင်အိပ်ရေးပျက်လို့နွမ်းနယ်နေတဲ့ခန္ဓာကိုယ်နဲ့နောက်ကျိနေတဲ့စိတ်နှလုံးကိုအမြန်ဆုံး တက်ကြွရွှင်လန်းသွားစေပါလိမ့်မယ်။
နန်းသီရိ (ဆေးဝါး)
