နှလုံးကျန်းမာရေးကောင်းစေရန် တွဲဖက်စားသင့်သော အာဟာရများ

♦ သွေးဖိအားပုံမှန်ဖြစ်ဖို့နဲ့ နှလုံးရောဂါဖြစ်နိုင်ခြေလျော့နည်းဖို့အတွက် ဗီတာမင်နဲ့ သတ္တုဓာတ်တွေကို တွဲဖက်ပြီး အတူတူ စားသုံးရပါမယ်။ အာဟာရဓာတ်အများစုဟာ စုပေါင်းပြီးလုပ်ဆောင်တာကြောင့် အကျိုးရလဒ် ပိုပြီးကောင်းမွန်နိုင်တဲ့အတွက်ပါ။ ဒါကြောင့် နှလုံးကျန်းမာရေးကောင်းမွန်ဖို့အတွက် တွဲဖက်ပြီး စားသုံးသင့်တဲ့အစားအစာတွေကို ဖော်ပြပေးလိုက်ပါတယ်။

 

♦ အစေ့အဆန်နဲ့ အခွံမာသီးမှာ ပါဝင်တဲ့ မဂ္ဂနီဆီယမ်က သွေးဖိအားကို ပုံမှန်ဖြစ်အောင်ထိန်းချုပ်ပေးပြီး သွေးကြောမာကျောမှုမရှိအောင်၊ နှလုံးခုန်နှုန်း စည်းချက်မှန်ကန်အောင် ပြုလုပ်ပေးပါတယ်။

♦ သူ့ကို ဗီတာမင် ဘီ ၆ နဲ့တွဲဖက်ပြီးစားသောက်ရင် ခန္ဓာကိုယ်က မဂ္ဂနီဆီယမ်ကို စုပ်ယူမှု ပိုမိုကောင်းမွန်နိုင်ပါတယ်။

♦ မဂ္ဂနီဆီယမ်က အသက် ၁၉-၃၀ နှစ်အရွယ် အမျိုးသမီးတွေအတွက် နေ့စဉ် ၃၁၀ မီလီဂရမ်လိုအပ်ပြီး အသက် ၃၁ နှစ်ကျော်သူတွေအတွက် နေ့စဉ် ၃၂၀ မီလီဂရမ်၊ အသက် ၁၉-၃၀ နှစ်အရွယ် အမျိုးသားတွေအတွက် နေ့စဉ် ၄၀၀ မီလီဂရမ်နဲ့ အသက် ၃၁ နှစ်ကျော်သူတွေအတွက် ၄၂၀ မီလီဂရမ်လိုအပ်ပါတယ်။

♦ ဗီတာမင် ဘီ ၆ နေ့စဉ်လိုအပ်ချက်က အသက် ၁၉ နှစ်မှ ၅၀ နှစ်အရွယ် အမျိုးသမီးနဲ့အမျိုးသားတွေအတွက် ၁.၃ မီလီဂရမ်၊ အသက် ၅၁ နှစ်ကျော် အမျိုးသားတွေအတွက် ၁.၇ မီလီဂရမ်နဲ့ အသက် ၅၁ နှစ်ကျော် အမျိုးသမီးတွေအတွက် ၁.၅ မီလီဂရမ်လိုအပ်ပါတယ်။

♦ မဂ္ဂနီဆီယမ်ရရှိအောင် ဗာဒံစေ့လိုမျိုးအခွံမာသီးနဲ့ ဟင်းနုနယ်တွေကို စားသုံးသင့်ပြီး ဗီတာမင် ဘီ ၆ ရရှိဖို့ ငှက်ပျောသီးလိုမျိုး ချက်ပြုတ်စရာမလိုအပ်တဲ့ အစားအစာတွေကို စားသုံးပေးရပါမယ်။

 

♦ သွေးအတွင်းက ဆိုဒီယမ်နဲ့ ပိုတက်စီယမ်ညီညွတ်မျှတမှုရှိတာက သွေးဖိအားကို ပုံမှန်ဖြစ်အောင် ထိန်းသိမ်းပေးနိုင်ပါတယ်။

♦ ဒီသတ္တုဓာတ်နှစ်မျိုးစလုံးဟာ ခန္ဓာကိုယ်အတွက် မရှိမဖြစ်လိုအပ်နေပြီး နှစ်မျိုးပေါင်းအတွဲအစပ်က ယင်နဲ့ ယန်လိုမျိုး သွေးဖိအားအပါအဝင် ကိုယ်တွင်းလုပ်ဆောင်ချက်အတော်များများကို ထိန်းချုပ်ပေးပါတယ်။

♦ ဆိုဒီယမ်စားသုံးတာများပြီး ပိုတက်စီယမ်စားသုံးတာ နည်းပါးတာကြောင့် သွေးဖိအားမြင့်တက်နိုင်ခြေ များပြားပါတယ်။

♦ လူတစ်ယောက်အနေနဲ့ တစ်နေ့ကို ဆိုဒီယမ် ၂၃၀၀ မီလီဂရမ်ထက်ပိုပြီး မစားသုံးဖို့ အမေရိကန်နှလုံးရောဂါအဖွဲ့က အကြံပေးထားပါတယ်။ စည်သွတ်ဘူး၊ ပြုပြင်ထားတဲ့အသား၊ ထုပ်ပိုးထားတဲ့အစာနဲ့ စားသောက်ဆိုင်က အစားအသောက်တွေမှာ ဆိုဒီယမ်များစွာ ပါဝင်ပါတယ်။

♦ ဒါကြောင့် အရန်သင့်စားလို့ရတဲ့ အစားအစာတွေကို မစားသုံးဘဲ အိမ်မှာပဲ ပိုတက်စီယမ်ပါဝင်မှုမြင့်မားတဲ့ ဟင်းနုနယ်ရွက်လိုမျိုး အစားအစာတွေကို ဆားပေါ့ဟင်း ချက်ပြုတ်ပြီး စားသုံးပါ။

♦ အမျိုးသားနဲ့ အမျိုးသမီးတွေအနေနဲ့ ပိုတက်စီယမ်ကို နေ့စဉ် ၃၄၀၀ နဲ့ ၂၆၀၀ မီလီဂရမ်စီ စားသုံးသင့်ပါတယ်။

 

♦ ဗီတာမင်ဒီ နဲ့ မဂ္ဂနီဆီယမ်ကို လုံလုံလောက်လောက်ရရှိတာက နှလုံးကို ပုံမှန်ဖြစ်အောင် ထိန်းချုပ်ပေးနိုင်ပါတယ်။

♦ ဗီတာမင်ဒီက သွေးဖိအားကို ပုံမှန်ဖြစ်အောင်ထိန်းသိမ်းပေးပြီး နှလုံးကျန်းမာရေးကိုကောင်းမွန်စေပါတယ်။ ဒါပေမဲ့ ဒီလိုအကျိုးကျေးဇူးရရှိဖို့ မဂ္ဂနီဆီယမ်ရဲ့ အကူအညီလိုအပ်ပါတယ်။

♦ မဂ္ဂနီဆီယမ်မရှိရင် ဗီတာမင်ဒီက active form ဖြစ်တဲ့ Calcitriol အဖြစ် ပြောင်းလဲနိုင်မှာ မဟုတ်ပါဘူး။

♦ ဒီအာဟာရနှစ်မျိုးစလုံးကိုရရှိဖို့အတွက် အစာစားတဲ့အခါမှာ အတူတူစားသုံးဖို့တော့ မလိုအပ်ပါဘူး။ ဒါပေမဲ့ နှစ်မျိုးစလုံးကို နေ့စဉ်လိုအပ်ချက်အတိုင်း ရရှိရပါမယ်။

♦ ဗီတာမင်ဒီကို အမျိုးသမီးနဲ့ အမျိုးသားတွေအနေနဲ့ နေ့စဉ် ၆၀၀ IU လိုအပ်ပါ တယ်။ ငါးနဲ့နို့ထွက်ပစ္စည်းတွေမှာ ဗီတာမင်ဒီ များစွာပါဝင်င်္ပြီး ဗာဒံစေ့၊ ပဲမည်းနဲ့ ဟင်းနုနယ်မှာ မဂ္ဂနီဆီယမ် များစွာပါဝင်ပါတယ်။

♦ ဗီတာမင်ဒီက ကယ်လ်စီယမ်နဲ့ပေါင်းစပ်ပြီး အရိုးကျန်းမာရေးကို အထောက်အကူပြုပါတယ်။ ဒါပေမဲ့ ကယ်လ်စီယမ်အားဖြည့်ဆေးကိုမှီဝဲတာက နှလုံးပြဿနာဖြစ်လာနိုင်တာမို့ မမှီဝဲခင် ဆရာဝန်နဲ့တိုင်ပင်ဆွေးနွေးသင့်ပါတယ်။

 

♦ သံဓာတ်ချို့တဲ့ သွေးအားနည်းမှုမဖြစ်အောင် သံဓာတ်နဲ့ ဗီတာမင်စီကို အတူတူ စားသုံးပါ။

♦ သံဓာတ်ဟာ ကိုယ်တွင်းက သွေးနီဥတွေ တည်ဆောက်ဖို့ မရှိမဖြစ်လိုအပ်တဲ့ သတ္တုဓာတ်ပါ။ သံဓာတ်ကိုအသားစားတာက ရရှိနိုင်သလို အပင်ထွက်ပစ္စည်းတွေက လည်းရရှိနိုင်ပါတယ်။

♦ သံဓာတ်ကို အသက် ၅၀ နှစ်ကျော်သူတိုင်း နေ့စဉ် ၈ မီလီဂရမ်လိုအပ်ပြီး အသက် ၁၉ မှ ၅၀ နှစ်အရွယ် အမျိုးသမီးတွေက နေ့စဉ် ၁၈ မီလီဂရမ် လိုအပ်ပါတယ်။

♦ သံဓာတ်ကို လုံလုံလောက်လောက်မရရှိတာကြောင့် သွေးအားနည်းရောဂါရရှိလာပြီး နှလုံးက အလုပ်ပိုလုပ်ရတဲ့အတွက် နှလုံးစည်းချက်မမှန်တာနဲ့ နှလုံးအလုပ်မလုပ်နိုင်တာတွေဖြစ်လာနိုင်ပါတယ်။

♦ သင့်အနေနဲ့ သံဓာတ်ကို လုံလောက်စွာရရှိအောင် ဗီတာမင်စီ များစွာပါဝင်တဲ့ အချဉ်အရသာရှိတဲ့ အသားအစာတွေနဲ့တွဲဖက်ပြီး စားသုံးရပါမယ်။ ဗီတာမင်စီက အပင်ထွက်ပစ္စည်းကရရှိတဲ့ သံဓာတ်စုပ်ယူမှုကိုကောင်းမွန်စေတာကြောင့်ပါ။

♦ ဒါပေမဲ့လည်း ကိုယ်တွင်းမှာ သံဓာတ်ပမာဏ အလွန်များလွန်း(အထူးသဖြင့် အသားကရရှိတဲ့သံဓာတ်) တာကြောင့် သွေးကြောတွင်း သွေးခဲဖတ်တွေစုဆောင်းမှုဖြစ်လာပြီး သွေးကြောမာကျောကျစ်လျစ်မှုတွေ ဖြစ်လာနိုင်ပါတယ်။

 

♦ နှလုံးရောဂါဖြစ်နိုင်ခြေနည်းပါးအောင် ဗီတာမင် ဘီ ၆ နဲ့ ဘီ ၁၂ ကို ဖောလိတ်နဲ့ အတူတူတွဲစားပါ။

♦ ဗီတာမင်ဘီတွေက အတူတူပေါင်းစပ်ပြီး စားသုံးရင် နှလုံးရောဂါနဲ့ ဆက်စပ်နေတဲ့သွေးတွင်းက အမိုင်နိုအက်စစ်တစ်မျိုးဖြစ်တဲ့ ဟိုမိုဆစ်စတင်းပမာဏကို လျော့ကျစေနိုင်ပါတယ်။

♦ ဖောလိတ်နဲ့ ဗီတာမင်ဘီ ၆ ကို ပမာဏများများမှီဝဲတာက နှလုံးသွေးကြောရောဂါ ဖြစ်နိုင်ခြေ လျော့နည်းတာနဲ့ဆက်စပ်မှုရှိတယ်လို့ လေ့လာမှုတွေအရ သိရပါတယ်။

♦ ဗီတာမင် ဘီ ၆ ကို ဟင်းနုနွယ်ကရရှိနိုင်ပြီး ကြက်ဥ၊ ကြက်သားနဲ့ နို့ထွက်ပစ္စည်းတွေက ဗီတာမင် ဘီ ၁၂ ကိုရရှိနိုင်ပါတယ်။

♦ နှလုံးကျန်းမာဖို့ အိုမီဂါ -၃ အဆီကို ဗီတာမင်နဲ့ သတ္တုဓာတ်တွေနဲ့ တွဲဖက်စားသုံးပါ။

♦ အိုမီဂါ -၃ ဖက်တီးအက်စစ်ဟာ မပြည့်ဝဆီတစ်မျိုးဖြစ်ပြီး နှလုံးကျန်းမာရေးကို အထောက်အကူပြုပါတယ်။ အထူးသဖြင့် နှလုံးရောဂါရှိနေသူတွေအတွက် ကောင်းမွန်ပါတယ်။

♦ အိုမီဂါ -၃ အဆီက အမျိုးအစား သုံးမျိုးရှိပါတယ်။ ဆယ်လ်မွန်ငါး၊ ငါးကွမ်းရှပ်နဲ့ တူနာငါးလိုမျိုး ငါးအမျိုးမျိုးမှာပါဝင်တဲ့ EPA နဲ့ DHA ရယ် ဂုဏ်လျှော်စေ့ ၊ ကန်နိုလာလိုလူမျိုး အပင်ထွက်အဆီတွေမှာပါဝင်တဲ့ ALA တို့ ဖြစ်ပါတယ်။

♦ ကိုယ်တွင်း အိုမီဂါ ၃ များများရဖို့အတွက် EPA နဲ့ DHA နှစ်မျိုးစလုံး(ဒီနှစ်မျိုးစလုံးက ALA ထက် ခန္ဓာကိုယ်က စုပ်ယူမှုပိုကောင်းပါတယ်)ပါဝင်တဲ့ ငါးဟင်းကို များများစားပေးရပါမယ်။

♦ ငါးဟင်းကို မကြိုက်နှစ်သက်လို့ မစားသုံးသူတွေနဲ့ သက်သတ်လွတ်စားသမားတွေက ALA ကိုပိုမိုရရှိဖို့ လိုအပ်ပါတယ်။

♦ ALA က ကိုယ်တွင်းမှာအစားအသောက်ထဲက မဂ္ဂနီဆီယမ်နဲ့သွပ်လိုမျိုး သတ္တုဓာတ် ၊ ဗီတာမင်စီ နဲ့ ဘီတွေရဲ့ အကူအညီနဲ့ EPA နဲ့ DHA အဖြစ်ပြောင်းလဲပေးနိုင်ပါတယ်။

♥ ဒေါက်တာခင်မိုးမိုး ♥

 

Post Author: Good Health Admin